Pakistanlı ruhani: “İranın Pakistan və Səudiyyə Ərəbistanının təhlükəsizliyinə xələl gətirməsinə imkan verməyəcəyik”

Pakistanlı ruhani: “İranın Pakistan və Səudiyyə Ərəbistanının təhlükəsizliyinə xələl gətirməsinə imkan verməyəcəyik”

GünAzTV: Pakistan Üləmalər Şurasının rəisi Tahir Mahmud Əşrəfi, mayın 9-da jurnalistlərə açıqlamasında İran Silahlı Qüvvələrinin baş qərargah komandanı Məhəmmədhüsyn Baqirinin Pakistanı təhdid edən son bəyanatına sərt reaksiya verib.

 

Tahir Mahmud Əşrəfi bildirib ki, İran hökuməti ağlını başına yığmalı, Pakistanı Suriya və İraqla səhv salmamalıdır: “Biz, İranın Pakistanı və Səudiyyə Ərəbistanını təhdid etməsini kəskin pisləyir, bildiririk ki, islam dünyası, İranın Pakistana və Səudiyyə Ərəbistanına əl uzatmasına, onların təhlükəsizliyinə xələl gətirməsinə imkan verməyəcək. Pakistan milləti öz ölkəsinin sərhədlərini və şərif hərəmlərin yerləşdiyi müqəddəs Səudiyyə Ərəbistanı ərazilərini necə qorumağı yaxşı bacarır.

 

Pakistan həmişə səbir və dözümlə bölgədə sülhün bərqərar olunmasına çalışıb. Lakin bəzi İran rəsmilərinin Pakistana qarşı bəyanatlar səsləndirməsi qəbuledilməzdir və bu kimi bəyanatlar qarşısında susmaq mümkün deyil. Yaxşısı budur ki, İran Pakistanı və Səudiyyə krallığını təhdid etmək əvəzinə digər ölkələrin daxili işlərinə müdaxiləsindən əl çəksin. Lakin təəssüflər olsun ki, İran və onun rəhbərləri Orta Şərqdə baş verən olaylardan ibrət dərsi almırlar. Bu isə narahatlığa səvbəb olur”.

 

İran Silahlı Qüvvələrinin baş qərargah komandanı Məhəmmədhüseyn Baqiri mayın 8-də jurnalistlərə açıqlamasında Pakistanla Səudiyyə Ərəbistanına qarşı sərt bəyanatlar səsləndirib. Baqirinin açıqlaması, İranın Pakistan sərhədinə yaxın Mircavə məntəqəsində 10 İran sərhədçisinin naməlum silahlı şəxslərin qəfil hücumunda öldürülməsindən iki həftə sonraya təsadüf edib.

 

Baqiri deyib ki, iki qonşu ölkənin müştərək sərhədlərinə hakim indiki durum İran üçün dözülməzdir və Pakistan rəsmiləri öz sərhədlərinə nəzarəti gücləndirməli, İran sərhədçilərini öldürən və bu ölkənin ərazisinə qaçan “terrorçu”ları tutub İrana təhvil verməlidir: “Əks təqdirdə, biz, Amerika tərəfindən təsdiq edilən və Səudiyyə Ərəbistanından məvacib alan bu muzdlu terrorçuları istənilən yerdə və ya istənilən ərazilərdə təqib edəcək, onlara kəskin və öldürücü zərbələr endirəcəyik”.

 

Xatırladaq ki, aprelin 26-sı axşam saat 20 radələrində İranın Pakistanla sərhəd Mircavə məntəqəsində insident yaşanıb. Belə ki, İran sərhədçiləri bölgədə reyd keçirərkən, naməlum şəxslərin Pakistan ərazisindən açdığı atəşə məruz qalıblar. Bir neçə dəqiqə davam edən atəş nəticəsində 10 İran sərhədçisi yerindəcə həlak olub, 3-ü ağır yaralanıb. Atəşin konkret kimlər tərəfindən açılması bəlli olmasa da, hücumun, yerli bəlucların dini və milli hüquqları uğrunda silahlı mübarizə apardıqlarını bildirən müxalif bəluc qruplarından biri tərəfindən gerçəkləşdirildiyi təxmin edilir.

A.M


HƏMÇİNİN OXUYUN

HƏMÇİNİN OXUYUN