Qalibaf: “Prezident seçilsəm, hökumətim işsizlərin hər birinə hər ay 250 min tümən maddi yardım göstərəcək”

Qalibaf: “Prezident seçilsəm, hökumətim işsizlərin hər birinə hər ay 250 min tümən maddi yardım göstərəcək”

GünAzTV: İranda prezidentliyə namizəd, Tehranın meri Məhəmmədbağır Qalibaf aprelin 24-də jurnalistlərə açıqlamasında prezident seçiləcəyi təqdirdə hökumətinin işsizlərlə bağlı yürüdəcəyi siyasətindən danışıb.

 

Qalibaf bildirib ki, əgər o seçkilərdə qalib gəlsə, onun hökuməti işsizlərin ağır durumu ilə maraqlanacaq, onların işlə təmin olunmasına yardım edəcək: “Bu qədər təbii mənbələri və sərvəti olan, ən yaxşı istedadlara və bu qədər yaradıcı gənc işçi qüvvəsi olan bir ölkədə iqtisadi durğunluğun mövcud olması və işsizliyin geniş vüsət alması təəssüfləndiricidir. Biz, zəngin bir ölkə olduğumuz halda əhalimiz yoxsul və kasıbdır. Bu isə ölkədə köhnə idarəçilik sisteminin olmasına və bu barədəki səriştəsizliyə görədir.

 

Mən seçkilərdə qalib gəlsəm, hökumətimin iqtisadi proqramlarından biri, ölkədə işsizliyə qarşı mübarizə və ən azı 5 milyon işsizin işlə təmin olunmasına şərait yaratması olacaq. Mən, prezident seçilsəm, 18 yaşından yuxarı olan və iş axtaran gənclər, hökumətimin təşəbbüsü ilə yaradılacaq bir qurumda qeydiyyata alınacaq və onlar işlə təmin olunmaq üçün tədricən ölkənin istehsalla məşğul olan müxtəlif sektorlarına və digər iqtisadi bölmələrinə təqdim ediləcəklər. Hökumət həm də həmin işsiz gənclərə işlə tam təmin olunana qədər maddi yardım göstərəcək. Belə ki, həmin gənclərin hər birinə hər ay 250 min tümən (təxminən 120 manat) aylıq maaş ödəniləcək və bu məbləğ aydan-aya onların bank hesablarına köçürüləcək. Bu yardım, onların işlə təmin olunması vaxta qədər davam edəcək”.

 

Tehran merinin seçki açıqlamasından sonra jurnalistlərə danışan prezidentliyə digər namizəd, vitse-prezident İshaq Cahangiri, Qalibafın işsiz gənclərə verdiyi vədləri boş və əsassız vədlər adlandıraraq bunun mümkün olmadığını bəyan edib: “Ölkə iqtisadiyyatının durmu, gücü və potensialı hamıya bəllidir. Əgər kimsə deyir ki, prezident seçiləcəyim təqdirdə bir neçə milyon nəfəri işlə təmin edəcəyəm, bilin ki, o şəxs yalan danışır və sadəcə olaraq milləti aldatmaq istəyir”.

 

Qeyd edək ki, İranda növbəti prezident seçkiləri, 2017-ci il, mayın 19-da (ordibeheştin 29-da) keçiriləcək.

A.M


HƏMÇİNİN OXUYUN

HƏMÇİNİN OXUYUN