Ruhani: “Görəsən, cəmiyyətimizdə siyasi atmosfer açılmalıdır, yoxsa ki, əvvəlki kimi qapalı saxlanılmalıdır”

Ruhani: “Görəsən, cəmiyyətimizdə siyasi atmosfer açılmalıdır, yoxsa ki, əvvəlki kimi qapalı saxlanılmalıdır”

GünAzTV: Aprelin 23-də Qəzvinə səfər edən İran prezidenti Həsən Ruhani tərəfdarları qarşısında çıxış edərk qarşıdan gələn prezident seçkilərindən danışıb.

 

Növbəti prezidentliyə namizədliyini irəli sürən Həsən Ruhani deyib ki, builki seçkilər, söz  azadlığının davam etdirilməsi ilə cəmiyyətə hakim kəsilən əvvəlki sərt və qapalı şəraitin qaytarılması arasında bir seçimdir: “Bu gün, kiminsə prezident seçilib-seçilməməsi mövzusu o qədər də əhəmiyyət daşıyan məsələ deyil. Söhbət ondan gedir ki, cəmiyyətimizdə siyasi atmosfer açılmalıdır, yoxsa ki, əvvəlki kimi qapalı şəraitdə saxlanılmalıdır. Görəsən, bu gündən sonra söz və ifadə azadlığına aparan yolu davam etdirmək istəyirik, yoxsa keçmişdəki kimi güclü nəzarət sisteminin universitetlərə və ali təhsil ocaqlarına yenidən qaytarılmasını istəyirik.

 

Hökumətimizin siyasi və mədəni azadlıqların təmin olunması istiqamətində apardığı işlər kifayət deyil. Bu barədə görülən işlər bizi razı etmir. Lakin bir şeyi də nəzərə almaq lazımdır ki, həmin sahələrdə bütün işlər hökumətin əlində və ixtiyarında olmayıb. Görəsən, ölkənin siyasi və iqtisadi şəraitində sabitliyin bərqərar olunmasını arzulayırıq, yoxsa ki, bu baxımdan hər gün və hər saat nigaranlıq içində yaşamaq istəyirik. Görəsən biz dünya birliyi ilə yenidən üz-üzə gəlməyi, müharibə təhlükəsinin ölkəni bürüməsini mi, yoxsa beynəlxalq ictimaiyyətlə konstruktiv münasibətlərə üstünlük verməyi arzulayırıq.

 

Ortaya çıxan sual budur ki, görəsən biz ölkənin dünya birliyi tərəfindən mühasirəyə alındığı və sanksiyalara məruz qoyulduğu vaxtlara qayıtmaq istəyirik, yoxsa ki, ölkəmizə qarşı bütün bu məhdudiyyətlərin həmişəlik aradan qaldırılmasını tələb edirik. Bəli, bu günlər, İran xalqının bu barədə qərar verməyinin vaxtı gəlib çatıb və millət özü seçim etməlidir”.

 

Qeyd edək ki, İranda növbəti prezident seçkiləri, 2017-ci il, mayın 19-da (ordibeheştin 29-da) keçiriləcək.

A.M


HƏMÇİNİN OXUYUN

HƏMÇİNİN OXUYUN