Ruhani İran kürdlərinə səsləndi: “Biz 100 faiz sizə inanırıq”

Ruhani İran kürdlərinə səsləndi: “Biz 100 faiz sizə inanırıq”

GünAzTV: Oktyabrın 11-də nazirlər kabinetinin iclasında çıxış edən İran prezidenti Həsən Ruhani İraq Kürdistanında keçirilmiş müstəqillik referendumundan və İran kürdlərindən danışıb.

 

Ruhani bildirib ki, İraq Kürdistanı rəhbərlərinin müstəqillik referendumu keçirməklə buraxdığı siyasi səhv, İran kürdlərinin ayağına yazılmamalı, onlara qarşı etimadsızlığa səbəb olmamalıdır: “Biz 100 faiz sizə (İran kürdlərinə) inanırıq və heç vaxt bir qrup şəxsin İraq Kürdistanında yol verdiyi siyasi səhvi sizin hesabınıza yazmarıq. Çünki siz böyük İran millətinin bir hissəsi olaraq İranın bölgədə ən köklü və ən vəfalı etnik qrupusunuz. Siz həmişə inqilabın və 8 il davam edən İran-İraq savaşı dövründə İran millətinin yanında olubsunuz.

 

Biz, İranda, İraqda, Suriyada və Türkiyədə yaşamasından asılı olmayaraq bütün kürd əhalisini sevir, onların xətrini istəyirik. Elə buna görə də kürdlərə hər hansı bir təzyiq göstərilməsini istəmirik. Hesab edirik ki, əgər İraq Kürdistanının rəsmiləri referendum keçirməklə böyük bir siyasi səhvə yol veriblərsə, onlar buraxdıqları bu səhvə görə cavabdeh olmalı,  bunun bədəlini ödəməlidirlər. Lakin adi kürd əhalisi, bölgədə inkişaf tərəfdarı olan sülhsevər insanlar olaraq hörmət və ehtirama malikdir. Xoşbəxtlikdən, İranın bütün etnik qrupları da bir-biri ilə müttəfiqdir, bütövdür. Onlar həmişə bir-birinin yanındadır. Bu birlik isə gündən-günə artır”. 

 

Xatırladaq ki, sentyabrın 25-də İraq Kürdistan Muxtariyyətində müstəqilliklə bağlı referendum keçirilib və səsverməyə qatılanların 92 faizindən çoxu müstəqilliyin lehinə səs verib. 

 

Səsvermənin nəticələri elan edildikdən az sonra, İranın Kürdistan əyalətinin bir neçə şəhərində yerli kürdlər gecə saatlarında küçələrə çıxaraq şənliyə başlamış, İraq kürdlərinin müstəqillik ideyasına dəstək vermişdilər. Yayılan məlumatlara görə, həmin şənliklərə qatılıb İraq kürdlərinə dəstək verən onlarla yerli kürd hüquq-mühafizə qüvvələri tərəfindən yaxalanmışdı.

 

A.M

 


HƏMÇİNİN OXUYUN

HƏMÇİNİN OXUYUN