Ruhani: “Millət, "qazi" və "vəkil" arasından birini seçməlidir”

Ruhani: “Millət,

GünAzTV: Mayın 15-də seçki kampaniyası aparmaq üçün Mazandaran əyalətinin mərkəzi Sari şəhərinə səfər edən İran prezidenti Həsən Ruhani tərəfdarları qarşısında çıxış edərək xalqı seçkilərdə düzgün seçim etməyə çağırıb.

 

Öz çıxışında, seçkilərdəki əsas rəqibi İbrahim Rəisini “qazi” adlandıraraq onun qanlı keçmişinə eyham vuran Ruhani deyib ki, bəzi qüvvələr milləti məyus etməyə çalışırlar: “Biz, bir daha geriyə qayıtmayacağıq. Əgər millət, ona qarşı yeni qətnamələrin qəbul olunmasını istəmirsə və əgər onun qarşısında yeni üfüqlərin açılmasını görmək istəyirsə, düzgün seçim etməli, “qazi” və “vəkil” arasından birini seçməlidir. Çünki, qazi hökm verir və onu icra elətdirir, vəkil isə insanların hüququnu müdafiə edir.

 

Bəziləri bizə qarşı şantaj aparır, xalqın dininin guya təhlükəyə düşməsindən dəm vurur, təbliğat aparırlar. Biz isə üzümüzü həmin şəxslərə tutub deyirik ki, dini qoruyub saxlayan hökumət yox, xalqın özüdür. O, öz dinini qoruyub saxlamağı yaxşı bacarır və sizin kimi qəyyuma ehtiyacı yoxdur. Siz, nə xalqın dininin qəyyumusunuz, nə də onların bu dünyadakı vəziyyət və yaşam tərzinin qəyyumu. Təəssüflər olsun ki, bəziləri milləti məyus etməyə və onları seçkilərə qatılmaqdan çəkindirməyə çalışırlar. Mən isə siz millətə bildirirəm ki, azadlıqla bağlı dediklərinizin hamısının gerçəkləşdirilməsi mümkündür. Yetər ki, seçkilərə qatılın və öz səsinizi sandığa salın”.

 

Mayın 8-də Həmədan şəhərinə səfər edən Həsən Ruhani, tərəfdarları qarşısında çıxış edərək İbrahim Rəisini dolayısıyla ölkədə dinc müxaliflərə qarşı həyata keçirilmiş repressiyalarda günahlandırıb.

 

Ruhani, ölkə əhalisi arasında “cəllad” və “ayətullah Edam” ləqəbləri ilə tanınan İbrahim Rəisinin adını çəkmədən onu dinc müxaliflərin qətlində günahlandırıb: “İran milləti, son 38 ildə  edam və zindandan başqa əlindən bir iş gəlməyənləri qəbul etmir”.

 

Xatırladaq ki, İbrahim Rəisi, 1988-ci ildə ölkə zindanlarında həbsini çəkməkdə olan minlərlə günahsız siyasi məhbusun gizli şəkildə kütləvi qətliamını sürətləndirmək üçün o vaxtkı dini lider ayətullah Ruhullah Xomeyninin əmri ilə yaradılmış “Ölüm heyəti”nin başçısı vəzifəsində çalışıb. Həmin vaxt, ölkə prokurorunun müavini vəzifəsində çalışan İbrahim Rəisinin cəmi 28 yaşı olub.

 

İranda növbəti prezident seçkiləri bu il, mayın 19-da (1396-cı il, ordibeheştin 29-da) keçiriləcək.

A.M

 


HƏMÇİNİN OXUYUN

HƏMÇİNİN OXUYUN