“Sepah”ın baş komandanı: “Dini liderin göstərişinə görə raketlərimizin qət edə bildiyi məsafə 2 min kilometrdir”

“Sepah”ın baş komandanı: “Dini liderin göstərişinə görə raketlərimizin qət edə bildiyi məsafə 2 min kilometrdir”

GünAzTV: İran İnqilab Keşikçiləri Korpusunun (Sepah) baş komandanı Məhəmmədəli Cəfəri, oktyabrın 31-də jurnalistlərə açıqlamasında ölkə raketlərinin gücündən və onların qət edə bildiyi maksimum məsafədən danışıb.

 

Cəfəri deyib ki, İranın dini lideri Əli Xamneyinin göstərişinə əsasən, hazırda ölkədə istehsal edilən raketlərin qət edə bildiyi məsafə 2 min kilometr təyin edilib: “ Qərara almışıq ki, raketlrimiz ən azı 2 min kilometrlik məsafəni qət edə bilsin. Hesab edirik ki, raketlərimizin bu qədər məsafəni qət edə bilməsi, hələlik  bizim üçün kifayətdir. Çünki amerikalılar ölkəmizdən 2 min kilometr aralıdadır və biz hücuma məruz qaldığımız hər bir zaman onlara layiqli cavab verə biləcəyik”.

 

Xatırladaq ki, “Sepah”ın baş komandanı oktyabrın 8-də Tehranda keçirilən “Sepah” strategiyası şurası”nın iclasında çıxış edərək Amerikaya qarşı sərt bəyanatlar səsləndirib.

 

Vaşinqtonun “Sepah”ı terrorçu qruplar siyahısına salmaq ehtimalına və ona qarşı tətbiq edəcəyi mümkün sanksiyalara toxunan Cəfəri Amerikanı təhdid etmişdi: “Əgər Amerika hökumətinin “Sepah”ı terrorçu qruplar siyahısına daxil etmək istəməsi barədə yayılan məlumatlar düz olsa, “Sepah” da dünyanın istənilən yerində, o cümlədən də Orta Şərqdə Amerika ordusuna İŞİD-ə bənzər bir qüvvə kimi baxacaq.

 

Əvvəllər də elan etdiyimiz kimi, bir daha xəbərdarlıq edib bildiririk ki, əgər Amerikanın İrana qarşı sanksiyalar qanunu icra olunsa, o zaman Vaşinqton özünün regional hərbi bazalarını İran raketlərinin qət etdiyi 2 min kilometrliyinə qədər geri çəkməlidir”.

 

A.M


HƏMÇİNİN OXUYUN

HƏMÇİNİN OXUYUN