“Sepah” rəsmisi, İranın raket istehsal edən "3-cü yeraltı zavodu"nun istifadəyə verilməsindən xəbər verib

“Sepah” rəsmisi, İranın raket istehsal edən

GünAzTV: “Sepah”ın hava-kosmik qüvvələrinin komandanı general Əmirəli Hacızadə mayın 25-də İranın Dezful şəhərində jurnalistlərə açıqlamasında ölkənin raket istehsal edən “3-cü yeraltı zavodu”nun istifadəyə verilməsindən danışaraq Səudiyyə Ərəbistanına qarşı təhdid dolu bəyanatlar səsləndirib.

 

“Sepah” rəsmisinin bu açıqlaması, ABŞ Senatının xarici əlaqələr komitəsinin İrana qarşı yeni sanksiyaların tətbiq olunması barədə layihə qəbul etməsindən bir neçə saat əvvələ təsadüf edib.

 

Həmin yeraltı zavodlarda İranın ilk ballistik raketini yaxın vaxtlarda istehsal edəcəklərini bildirən Hacızadə, İranın “Dezful” adlandırılacaq ilk yer-yer raketinin artıq istehsalına başlanmasından xəbər verib: “Bu isə İranda son illər təsis edilən və raket istehsalı ilə məşğul olan  3-cü yeraltı zavoddur. Biz, Müdafiə Nazirliyinin müdafiə sənayesi ilə yanaşı, raket silahları ilə bağlı hərbi güc və qabiliyyətimizi inkişaf etdirəcək, bu sahədə fəaliyyətimizi davam etdirəcəyik. Amerikalı tacirlərin bu xüsusdakı nigaranlığı və qorxusu da bizim üçün əhəmiyyətsizdir. Buna heç dəyər də vermirik”.

 

“Amerikalı tacirlər” dedikdə ABŞ prezidentliyinə seçilməzdən əvvəl bizneslə məşğul olan Donald Trampa ehyam vuran Hacızadə, onun bir neçə gün əvvəl Səudiyyə Ərəbistanına səfərinə toxunaraq Ər-Riyadın Amerikadan aldığı silahlara və iki ölkə arasında bu barədə imzalanan müqavilələrə də münasibət bildirib: “Səudiyyə Ərəbistanının Amerikadan aldığı silahlar bizi narahat etmir. Səddam Hüseynlə 8 illik savaşımızda, İraqın hərbi silah-sursatının bir hissəsini  qənimətə götürdüyümüz kimi, bir gün də gələcək ki, Ər-Riyadın Amerikadan aldığı həmin silahlardan sionist rejiminə qarşı istifadə edəcəyik”.

 

Mayın 25-də ABŞ Senatının xarici əlaqələr komitəsində İrana qarşı yeni sanksiyaların tətbiq olunması barədə layihə qəbul edilib. Yeni sanksiyaların tətbiqi, İranın ballistik raket proqramını genişləndirməsinə, radikal yaraqlı islamçı qruplaşmalara dəstək verməsinə, onlara silah-sursat çatdırmasına, eləcə də İranda insan haqlarının kobud şəkildə pozulmasına görə nəzərdə tutulub. ABŞ Senatının nümayəndələri bildiriblər ki, onların qəbul etdiyi bu layihə, qanuna çevrilməsi üçün Amerika Konqresinin Nümayəndələr Palatası və ABŞ prezidenti Donald Tramp tərəfindən dəstəklənməlidir.

A.M

 


HƏMÇİNİN OXUYUN

HƏMÇİNİN OXUYUN