Xamneyi: “İraq Kürdistanında keçirilmiş referendum bölgəyə qarşı bir xəyanət və təhdiddir”

Xamneyi: “İraq Kürdistanında keçirilmiş referendum bölgəyə qarşı bir xəyanət və təhdiddir”

GünAzTV: İranın dini lideri Əli Xamneyi oktyabrın 4-də ölkəyə səfər edən Türkiyə prezidenti Rəcəb Tayyib Ərdoğan və onu müşayiət edən yüksək rütbəli heyət üzvləri ilə görüşüb. Görüşə İran prezidenti Həsən Ruhani və xarici işlər naziri Məhəmmədcavad Zərif də qatılıb.

 

Görüşdə İranla Türkiyə münasibətlərinin genişləndirilməsindən və bölgədəki durumdan danışan Xamneyi, bir neçə gün əvvəl İraq Kürdistanında müstəqilliklə bağlı keçirilmiş referenduma münasibət bildirib.

 

Xamneyi deyib ki, Tehranla Ankara İraq Kürdistanının müstəqilliyinin qarşısını almaq üçün qarşılıqlı siyasi- iqtisadi əlaqələri gücləndirməli, bir-biri ilə fikir mübadiləsi aparmalı və lazım olarsa birgə qərar verməlidir: “İraq Kürdistanında keçirilmiş referendum bölgənin gələcəyinə qarşı bir xəyanət və təhdiddir. Bunun isə qonşu ölkələrə qarşı uzunmüddətli fəsadları ola bilər. Hesab edirik ki, İranla Türkiyə bu olayın qarşısını almaq üçün mümkün olan hər hansı bir addımı atmalı, İraq hökuməti isə bu məsələyə ciddi yanaşaraq ona qarşı qərar verib tədbir görməlidir.

 

Amerika və Avropa ölkələrinin bu məsələyə yanaşma tərzi İran və Türkiyənin münasibətindən fərqlidir. Amerikaya və digər xarici güclərə etimad etmək mümkün deyil. Onlar regionda yeni bir İsrail yaratmaq istəyirlər. Bu isə yolverilməzdir. Amerika çalışır ki, onun əlində həmişə İran və Türkiyəyə qarşı bir təzyiq vasitəsi olsun və istənilən vaxt onlara təzyiq göstərə bilsin. Məhz buna görə də düşünürəm ki, amerikalılarla avropalılara və onların bu məsələ ilə bağlı mövqeyinə  etimad göstərmək olmaz”.

 

                          Türkiyə prezidenti Rəcəb Tayyib Ərdoğan

 

Görüşdə Türkiyə prezidenti Rəcəb Tayyib Ərdoğan iki ölkənin İraq Kürdistanında keçirilmiş müstəqillik referendumuna qarşı birgə tədbir görməsinin vacibliyindən danışıb: “İnkarolunmaz sənəd və dəlil-sübutlara görə Amerika və İsrail Kürdistan məsələsində ümumi bir razılığa gəliblər. Məsud Barzani isə bu referendumu keçirməklə bağışlanmaz bir səhvə yol verib. Aydın məsələdir ki, İraqın qonşuları onların bu qərarı ilə razılaşa bilməzlər”.

 

Xatırladaq ki, sentyabrın 25-də İraq Kürdistan Muxtariyyətində müstəqilliklə bağlı referendum keçirilib və səsverməyə qatılanların 92 faizindən çoxu müstəqilliyin lehinə səs verib. 

 

 

 

 

A.M


HƏMÇİNİN OXUYUN

HƏMÇİNİN OXUYUN