Xamneyi: “Ölkənin taleyi millətin əlindədir. Seçicilər tez sandıq başlarına gəlsinlər”

Xamneyi: “Ölkənin taleyi millətin əlindədir. Seçicilər tez sandıq başlarına gəlsinlər”

GünAzTV: İranın dini lideri Əli Xamneyi mayın 19-u sübh saatlarında prezident seçkilərinə rəsmən start verildikdən az sonra səsverməyə qatılaraq öz səsini “İmam Xomeyni” hüseyniyyəsinə gətirilən 110 saylı səyyar sandığa salıb.

 

Öz namizədinə səs verdikdən sonra jurnalistlər qarşısında kiçik bir nitq söyləyən Xamneyi, ölkə əhalisini seçkilərdə fəal olmağa, səsvermə məntəqələrinə gedərək prezidentliyə namizədlərdən birinə səs verməyə çağırıb: “Ölkənin taleyi millətin əlindədir. Millət, bu işə diqqətlə yanaşmalı, seçkilərə qatılmalıdır. Seçkilər, ilahi bir nemətdir. Allaha şükürlər olsun ki, bizim insanlar da bu nemətin qədrini bilir, göründüyü kimi səsvermədə iştirak edirlər.  Seçicilərə tövsiyə edirəm seçkilərdə daha fəallıq nümayiş etdirərək tez sandıq başlarına gəlsinlər və öz səslərini versinlər.

 

Hesab edirəm ki, yaxşı və xeyirli bir işi sonraya saxlamaq düzgün deyil. Bunu, vaxtın əvvəlində yerinə yetirmək lazımdır. Bu işi təxirə salmaq olmaz. Prezident seçkiləri çox önəmlidir. Çünki millət bu seçkilərdə ölkə prezidentini seçir. Elə buna görə də seçicilərdən istəyim budur ki, bu mühüm işə diqqət və həssaslıqla yanaşsınlar”.

 

Bu gün (mayın 19-da) İranda 12-ci prezident seçkiləri keçirilir. Seçkilərdə dörd namizəd, Həsən Ruhani, İbrahim Rəisi, Mustafa Mirsəlim və Mustafa Haşimi Təba bir-biri ilə rəqabət aparır. Əsas rəqabət isə, iki namizəd arasında, islahatçıların dəstəklədiyi Həsən Ruhani və dini lider Əli Xamneyinin yaxın adamı kimi tanınan İbrahim Rəisi arasında aparılır.

A.M


HƏMÇİNİN OXUYUN

HƏMÇİNİN OXUYUN