Avropa Birliyi güneyli alim haqda çıxarılan edam hökmü ilə bağlı İrana nota verib

Avropa Birliyi güneyli alim haqda çıxarılan edam hökmü ilə bağlı İrana nota verib

GünAz TV: Bir Almaniya qəzeti Avropa Birliyinin təbrizli araşdırmaçı-alim Prof. Dr. Əhmədrza Calalinin edam cəzasına məhkum edilməsi ilə bağlı İran hökumətinə nota verdiyini yazıb.

 

İsveçdə (Sued) yaşayan azərbaycanlı alim “Düşməm ölkələrlə əməkdaşlıq etmək” ittihamı ilə edam cəzasına məhkum edilib, o hazırda Tehranın Evin zindanında saxlanılır.

 

“Heilbroner Stimme” qəzeti noyabrın 25-də yaydığı bir xəbərdə qeyd edib ki, Dr. Əhmədrza Calali haqda çıxarılan məhkəmə hökmü ilə əlaqədar, Avropa Birliyi oktyabrın sonunda Tehranda bu ölkənin rəsmilərinə öz etirazını bildirib.

 

Verilən notada 46 yaşlı azərbaycanlı alimin “İsrail dövləti ilə əməkdaşlıq”da günahlandırılaraq edam cəzasına məhkum edilməsinə kəskin etiraz edilib.

 

Qəzet Almaniya Xarici İşlər Nazirliyinin alimin dosyesi ilə bağlı nigaran olduğunu, onu diqqətlə izlədiyini qeyd edib.

 

“Deutsche Welle”nin məlumatına görə isə dünyada elm və alimlərin azad fəaliyyətini müdafiə edən “Nigaran Alimlər Komitəsi” də bu məsələyə görə İranı qınayıb, komitə Almaniya kansleri Angela Merkel və daha bir neçə avropalı siyasətçinin ofisinə etiraz məktubu göndərib.

 

Angela Merkelin ofisi Dr. Əhmədrza Calali ilə bağlı  “Nigaran Alimlər Komitəsi”ndən məktub aldığını təsdiqləyib. 

 

Məktubda siyasətçilərdən İranda həbsdə olan tanınmış alimə dəstək vermələri tələb olunub.

 

Bundan öncə müxtəlif ixtisaslar üzrə 74 nobel mükafatı laureatı İranın Birləşmiş Millətlər Təşkilatındakı (BMT) nümayəndəliyinə məktubla müraciət edərək azərbaycanlı araşdırmaçı-alimin azadlığa buraxılmasını tələb ediblər.

 

Bir çox mənbələr təbrizli alimin İslam İnqilabı Keşikçilər Korpusu (“Sepah”) və digər təhlükəsizlik qüvvələri ilə gizli əməkdaşlıq təklifindən imtina etdiyinə görə edam cəzasına məhkum edildiyini bildirir. 9 il öncə İsveçin Stokholm şəhərinə gedən Dr. Əhmədrza Calali təbii fəlakətlər üzrə doktorluq dərəcəsini İsveçin Karolinska İnstitutundan alıb, bundan sonra o həyat yoldaşı və iki övladı ilə birlikdə İsveçdə qalmalı olub. Tanınmış alim İtaliya və Belçika kimi ölkələrdə elmi-tədqiqat müəssisələrində də çalışıb.

 

Dr. Əhmədrza Calali 2016-cı il aprelin 24-dən Tehranın Evin zindanında həbsdədir. O Tehran və Şiraz universitetlərinin dəvəti ilə elmi konfransa qatılmaq üçün İrana səfər etdiyi zaman saxlanılıb.

 

N.S

 


HƏMÇİNİN OXUYUN

HƏMÇİNİN OXUYUN