Bu büdcə ilə məhrumiyyət içində olan məntəqələrimizi inkişaf etdirmək mümkün olmayacaq – Urmiyənin Bələdiyyə başqanı

Bu büdcə ilə məhrumiyyət içində olan məntəqələrimizi inkişaf etdirmək mümkün olmayacaq – Urmiyənin Bələdiyyə başqanı

GünAz TV: Qərbi Azərbaycan Əyalətinin mərkəzi şəhəri Urmiyənin Bələdiyyə İdarəsi başqanı Məhəmməd Həzrətpur bölgənin ağır iqtisadi vəziyyətindən danışıb.

 

O bu barədə Qərbi Azərbaycan Valiliyində müqavimət iqtisadiyyatı mövzusunda keçirilən iclasda bəhs edib.

 

“Hazırda  bizim əsas nigaranlığımız iqtisadi durumu zəif və məhrumiyyət içində olan məntəqələrin inkişafı məsələsidir. Çalışırıq ki, bu məntəqələrin iqtisadi göstəriciləri yaxşılaşsın və əhalinin problemləri öz həllini tapsın. Lakin bu məqsədlə nəzərdə tutulan layihələrin icrası indiki büdcə ilə mümkün deyil. Əgər bu məntəqələr inkişaf etdiriləcəksə, o zaman bölgəyə daha çox büdcə ayrılmalıdır”- deyə o vurğulayıb.

 

Urmiyənin Bələdiyyə başqanı öz söhbətində Türkiyə sərhəddində yerləşən Çaldıran şəhərinin vəziyyətinə xüsusi yer verib.

 

“Çaldıranda əhalinin artım səviyyəsi mənfi deyil, sadəcə bölgədən köçənlərin sayı çoxdur. Bu şəhərdə kanalizasiya sistemi və ətraf kəndlərdə yol problemi kimi çoxlu çatışmamazlıqlar var. İnkişafdan geri qalmış məntəqələrdə birinci mərhələdə infrastrukturla bağlı problemlər üzərində çalışmaq lazımdır. Ona görə də, Çaldıran şəhərində ilk öncə kanalizasiya sistemi və kəndlərə asfalt yol çəkilməlidir”- deyə o qeyd edib.

 

M.Həzrətpur əlavə edib ki, Çaldıran kəndlərinin yolu olmayanadək oraya müəllim getməyəcək, getsə də, bir il qaldıqdan sonra məntəqəni tərk edəcək. Ona görə də mən düşünürəm ki, Çaldıranın inkişafı üçün ilk öncə yol və kanalizasiya sistemi, sonra isə təbii qaz və turizmin inkişafı məsələləri öz həllini tapmalıdır.

 

Qeyd edək ki, Güney Azərbaycanın müxtəlif bölgələrinin inkişafdan geri qalması kimsəyə gizli deyil. Bu proses islam inqilabından sonra daha da şiddətləyib. İqtisadi tənəzzül və yoxsulluğun artması təkcə sərhədyanı şəhər və kənlər deyil, hətta Təbriz, Ərdəbil və Urmiyə kimi böyük şəhərləri də əhatə edir. Azərbaycan və fars şəhərlərinə ayrılan büdcənin məbləğindəki fərq, bir çox müzakirəli məsələlərə aydınlıq gətirir.

 

N.S


HƏMÇİNİN OXUYUN

HƏMÇİNİN OXUYUN