İran rejimi Qaşqay türkcəsində səhnələşdirilən tamaşanın nümayişini dayandırıb

İran rejimi Qaşqay türkcəsində səhnələşdirilən tamaşanın nümayişini dayandırıb

GünAz TV: Qaşqay türklərinin yaşadığı Firuzabad şəhərində “Qara çadır gəlini” tamaşasının nümayişi dayandırılıb.

 

Bu barədə Qaşqay türklərinin mədəni fəalları tərəfindən xəbər yayılıb.

 

Məlumata görə, Əkrəm Mirzayinin rəhbərliyi ilə səhnəyə çıxarılan “Qara çadır gəlini” Qaşqay türkcəsində hazırlanıb. İslami İrşad və Mədəniyyət İdarəsindən alınan icazəyə əsasən, tamaşa avqustun 12-dən 19-dək həmin idarənin mədəniyyət salonunda səhnəyə çıxarılmalı idi, lakin səhnələşdirildikdən 3 gün sonra onun nümayişi Firuzabadın İrşad İdarəsi və Ettelaat (İran Kəşfiyyat Nazirliyi) əməkdaşları tərəfindən dayandırılıb.

 

Əldə edilən məlumata görə, tamaşa üçüncü axşam səhnələşdirildikdən sonra İrşad İdarəsinin rəisi bir neçə Ettelaat əməkdaşı ilə birlikdə salona gələrək onun icrasını dayandırıblar. Onlar bildirib ki, Tehrandan gələn gizli məktubda tamaşanı səhnələşdirən qrupun belə bir icazəsi olmadığı qeyd olunub. Ona görə də tamaşanın nümayişi dayandırılmalıdır. Onlar həmçinin tamaşa ilə bağlı şəhərdə yayılan bannerlərin də toplanmasını tələb ediblər.

 

Bununla da yerli əhalinin böyük rəğbətini qazanan tamaşanın nümayişini təyin edilmiş tarixə qədər davam etdirmək mümkün olmayıb.

 

Qaşqay türkləri bir türk eli kimi, daim İran rejiminin təzyiqi altında olub. Bir neçə şəhərdə, lakin kompakt şəkildə yaşayan Qaşqay türklərinin fəalları müəyyən mədəni tədbirlər keçirməklə rejimin asimilasyon siyasəti qarşısında müqavimət göstərməyə çalışırlar.

 

N.S


HƏMÇİNİN OXUYUN

HƏMÇİNİN OXUYUN