İranın Azərbaycan Respublikası və GünAz TV-yə qarşı sistemli təxribatı davam edir

İranın Azərbaycan Respublikası və GünAz TV-yə qarşı sistemli təxribatı davam edir

GünAz TV: İran rejiminin Azərbaycan Dövləti və Güney Azərbaycan Milli Hərəkatı, o cümlədən aktiv kütləvi informasiya vasitələrinə qarşı sistemli təxribatı müxtəlif formalarda davam etməkdədir.

 

Demokratik hökumətlər ölkə problemlərini qarşılıqlı dialoq, müzakirə və statistik məlumatlar əsasında təhlil vasitəsi ilə həll etdikləri halda, irqçi və totaliter rejimlər bir qayda olaraq sistemin qeyri-demokratik hərəkətlərini görüb ona qarşı etiraz edən qrupları xarici qüvvələrə bağlı olmaqda ittiham edərək onların qanuni tələbləri qarşısında zorakılıq yolu ilə müqavimət göstərir. Bu yanaşmanı İranda islam inqilabından sonra bütün sahələrdə görmək mümkündür.

 

İranda XX-ci əsrin 90-cı illərindən millətlərin, xüsisi ilə də türklərin milli kimlik məsələsi və bu istiqamətdə gedən ictimai-siyasi proseslər yeni mərhələyə daxil oldu. İran rejimi ölkədə yaşayan millətlər, o cümlədən türklərin tələblərini gözdən keçirmək yerinə ona qarşı repressiya və zorakılıq yolunu seçdi. Eyni halda Güney Azərbaycana təsir imkanlarını məhdudlaşdırsın deyə Azərbaycan Respublikasını inkişafdan saxlamaq üçün Azərbaycandakı radikal şiə qrupları dövlətə qarşı təhrik etməyə başladı, bu istiqamətdə Azərbaycanın 20 faiz torpaqlarını işğal altında saxlayan Ermənistanla müxtəlif sahələrdə əməkdaşlıq edərək onu gücləndirməyə çalışdı, bu proses hələ də davam edir.

 

Lakin bütün bunlara baxmayaraq Güney Azərbaycanda gedən ictimai-siyasi cərəyanı dayandırmaq mümkün olmadı və Milli Hərəkat fəallarının tələbləri əhalinin böyük əksəriyyəti tərəfindən dəstəkləndi. Bu məsələ İran rejiminin ciddi nigaranlığına səbəb oldu və Azərbaycan məsələsi Milli Təhlükəsizlik Şurasının gizli tədbirlərində müzakirə olunmağa başladı. Rejim Milli Hərəkatın qarşısını almaq üçün müxtəlif önləyici planlar üzərində işləyib və müxtəlif ssenarilərə əl atdı. Bu planlardan ən əsası Azərbaycan Milli Hərəkatının kütləvi informasiya vasitələri, o cümlədən Güney Azərbaycanın təkcə səsi olan GünAz TV-yə qarşı təxribatçı tədbirlərin alınması idi.

 

2004-cü ildən Güney Azərbaycan və İran coğrafiyasında yaşayan digər türk xalqlarının milli yöndə maarifləndirilməsi uğrunda fəaliyyət göstərən GünAz TV əhali arasında nüfuz qazandıqca özünə qarşı rejimin qəzəbini artırdı. Azərbaycan Respublikasını zəiflətmək məqsədi ilə radikal şiələrə yönəlik  təhrikamiz verilişlər yayan “SƏHƏR TV”, Güney Azərbaycan Televiziyasına qarşı bir çox yalan və böhtan xarakterli məlumatlar yaydı. “Fars News”, “Tabnak”, “Təsnim News”, “Anac”, “Azəriha”, “Aran News”, “Mehr News” və s. kimi İran saytları da eyni istiqamətdə hərəkət edərək GünAz TV-ni təxrib etməyə çalışdılar. Bu arada ETTELAAT Nazirliyinə bağlı olan “Azəriha” saytının Güney Azərbaycanla bağlı təhrifləri, GünAz TV və onun rəhbəri Əhməd Obalı ilə əlaqədar yaydığı məlumatlar öz təxribatçılıq xarakteri ilə seçilir.

 

Ötən həftələrdə isə Şərqi Azərbaycan Teleradio Şirkətinin Bəsic Təşkilatı və “Sepah”ın Aşura briqadasının dəstəyi ilə GünAz TV-yə qarşı növbəti təxribat hazırladığı öyrənildi. Dekabrın 5-də Şərqi Azərbaycan Teleradio Şirkəti bəsiclərinin keçirdiyi tədbirdə, rəsmi orqanın anti-Azərbaycan fəaliyyəti ilə bağlı yeni açıqlama verildi. Mətbuatda yayılan məlumatda bildirilir ki, “Şərqi Azərbaycan Teleradio Şirkətinin rəisi Möhsün Lətifi Qarabağ, Nardaran, Şah İsmail və GünAz TV sənədli filmlərinin çəkildiyi barədə xəbər verib. O bildirib ki, bu sənədli filmlərin bir neçəsi hazırdır, bəzilərinin isə üzərində iş gedir.”

 

Bu filmlərin məzmunu hələlik bəlli olmasa da, lakin onların adından Azərbaycan türk millətinin milli mənafeyi və milli birliyinin hədəfə alındığını indidən demək mümkündür. Misal üçün, Nardaran filmində İranın dəstəklədiyi  şiə terrorçularından təqdir olunacaq, onların təxribatçı hərəkətləri islam və şiəliyə xidmət kimi göstəriləcək. Dağlıq Qarabağ barəsində də  həqiqətlər alt-üst şəkildə nümayiş etdiriləcək. GünAz TV haqqında isə Azərbaycan türklərinin baxışının dəyişdirilməsinə çalışılacaq. Bu istiqamətdə Telekanalın qurucusu və onun həmkalarına qarşı qarayaxma və təxribat kampaniyası davam etdiriləcək.

 

İran rejimi Azərbaycan Milli Hərəkati və onun təkcə səsi olan GünAz TV-ni təxrib etməklə cəmiyyətin gözündə itirdiyi legitimliyi yenidən bərpa edəcəyinə ümid edir. Lakin təcrübə bunun tərsini göstərib. Toplumun içindən çıxan bir ictimai-siyasi cərəyan və onunla bağlı olan orqanları təxrib etmək, həmin orqanların daha da güclənməsi və nüfuz qazanması ilə nəticələnir, əhalinin isə rejimə qarşı aqresiyası biraz da artır. Arazın hər iki tərəfində yaşayan Azərbaycan türk milləti İran rejiminin terrorçu və təxribatçı xarakteri ilə artıq tanışdır və İran rejiminin Güney Azərbaycanın təkcə səsi olan televiziyası və Azərbaycan Respublikasına qarşı mənfi təbliğatını özünə qarşı bir təxribat olduğunu yaxşı başa düşür.

 

N.S


HƏMÇİNİN OXUYUN

HƏMÇİNİN OXUYUN