Şəhər həndəvərində yerləşən yaşayış məntəqələri 8 şəhər üçün problemə çevrilib – Qərbi Azərbaycanda

Şəhər həndəvərində yerləşən yaşayış məntəqələri 8 şəhər üçün problemə çevrilib – Qərbi Azərbaycanda

GünAz TV: Güney Azərbaycanın müxtəlif bölgələrində  kəndlərdən şəhərə köç edən əhalinin böyük əksəriyyəti, imkansızlıqdan şəhər həndəvərində məskən salır.

 

Qərbi Azərbaycan valisi Qurbanəli Səadət təmsil etdiyi vilayətin bir neçə şəhərinin qeyri-rəsmi yaşayış məntəqələrindən əziyyət çəkdiyini bildirib.

 

O bu barədə İnşaat Mühəndisiliyi Təşkilatı ümumi heyətinin 20-ci iclasında çıxış edərkən danışıb.

 

“Bölgədə bir çox problemlərlə üz-üzəyik. Şəhərlərdə Bələdiyyə İdarələrinin maliyyə durumu yaxşı deyil. Bu səbəbdən bir çox problem yaşanır. Bəzi Bələdiyyə İdarələri hətta öz işçilərinin maaşını belə ödəyə bilmir. Onların əsas gəliri sadəcə əlavə dəyərdən əldə olunan vəsaitdən ibarətdir. Düşünürəm ki, Bələdiyyə İdarələri öz gəlirləri və idarəçilik üsulu ilə bağlı hansısa çıxış yolu tapmalıdılar”- deyə vali bildirib.

 

Qurbanəli Səadət Qərbi Azərbaycan şəhərlərinin inkişafdan geri qalması barədə qeyd edib ki, “Qərbi Azərbaycan Vilayətində yerləşən 8 şəhərin inkişafı üçün müəyyən problemlər var. Şəhər həndəvəri və qeyri-rəsmi yaşayış məntəqələrində yoxsulluq hökm sürür, bu vəziyyət şəhərlərin inkişafı üçün böyük maneədir. Düşünürəm ki, bölgənin problemləri araşdırılmalı, sonra isə şəraitə uyğun olaraq plan və qanunlar tətbiq olunmalıdır.”

 

Qərbi Azərbaycan valisi İnşaat Mühəndisiliyi Təşkilatını şəhərlərdəki problemləri aradan qaldırmaq üçün daha fəal olmağa, bu istiqamətdə Yol və Şəhərsalma Nazirliyinə yardımçı olmağa çağırıb.

 

Ekspertlərin fikrinə görə, şəhər həndəvərində qeyri-rəsmi şəkildə yaşamaq yoxsulluq və mühacirət amilləri ilə bağlıdır. Belə məntəqələrdə əhalinin gəlir və nəticədə savad səviyyəsi aşağı olur, ona görə də insanların bir çoxu müxtəlif qanunsuz işlərlə məşğul olur. Azyaşlı uşaqlar işə cəlb olunur və müxtəlif cinayətlər baş verir. Bir sözlə desək şəhər həndəvərindəki yaşayış məntəqələrində ictimai, iqtisadi və mədəni baxımdan bir çox problem yaşanır.

 

N.S 


HƏMÇİNİN OXUYUN

HƏMÇİNİN OXUYUN