Təbriz Podşipnik Zavodunun işçiləri etiraz yığıncağı keçirib

Təbriz Podşipnik Zavodunun işçiləri etiraz yığıncağı keçirib

GünAz TV: Güney Azərbaycanın əksər sənaye və istehsal müəssisələri bazarda olan durğunluq və bölgədə hökm sürən iqtisadi tənəzzül səbəbindən işçilərin əmək haqlarını ödəmək iqtidarında deyil.

 

Son məlumata görə, Təbriz Podşipnik (bolbrinq) Zavodunun 100-dən çox işçisi 4 aydır əmək haqlarını ala bilmədikləri üçün Təbriz Şəhər İca Hakimiyyəti (fərmandari) binasının önündə etiraz yığıncağı keçiriblər.

 

Şənbə günü keçirilən yığıncaq zamanı iştirakçılarından bir neçəsi “İlna” xəbər agentliyinə 4 aydır maaş və sığorta haqlarının ödənilmədiyini deyərək sahibkardan şikayətçi olduqlarını bildiriblər.

 

“Zavod 10-cu hökumət zamanı (Əhmədinəjad dövrü) özəlləşdirildi, o gündən bəri şirkət likvidlik (nəğdinəgi) problemi ilə üzləşib. Artıq işçilərin maaşlarının 3, 4 ay gecikməsi adi hala çevrilib”- deyə işçilər bəyan edib.

 

Şərqi Azərbaycanın İş üzrə İslami Şuralar Koordinasiya Mərkəzinin rəisi Çingiz Qasimi “İlna” xəbər agentliyinə danışarkən işçilərin sözünü təsdiqləyib. “Sənaye müəssisələri, o cümlədən Təbriz Podşipnik Zavodunun problemləri, onların özəlləşdirilməsindən sonra başlayıb”- deyə o vurğulayıb.

 

 

Təbriz Şəhər İcra Hakimiyyəti başçısı Rəhim Şöhrəti də oxşar açıqlama ilə çıxış edib.

 

“Bu problemlə bağlı Ticarət və Mədən Sənayesi Nazirliyi  məsuliyyət daşıyır. Yerli məsulların bütün xəbərdarlığına baxmayaraq zavodun problemləri məsələsinə çox gec baxıldı. Zavod 10-cu hökumət dövründə Sənaye və Mədən Bankı vasitəsi ilə özəl sektora ötürüldü, zavodu təhvil alan şəxs onu idarə etmək imkanına malik deyil. Düşünürəm ki, istehsal vəziyyətində olan bir zavodun belə bir şəxsə buraxılması, onu iflasa uğratdı. Bu şirkət təmami ilə özəl müəssisədir, istənilən problemə sahibkarın özü cavabdeh olmalıdır. Lakin sahibkar imkansızlıqdan problemləri həll edə bilməsə, o zaman himayəçilər hərəkətə keçib, yeni tədbirlər görməlidilər”- deyə R.Şöhrəti qeyd edib.

 

Təbriz Podşipnik Zavodu Azərbaycanın çox önəmli sənaye müəssisələrindən biridir, zavod uzun müddətdir dövlətin yalnış siyasətləri nəticəsində bir çox problemlə üz-üzə qalıb. Son illərdə Şərqi Azərbaycanda 25-dən çox sənaye müəssisəsi dövlət tərəfindən özəl müəssisə vəya fiziki şəxslərə ötürülüb, onlardan hazırda ən azı 21-i ciddi maliyyə sıxıntısı ilə üz-üzə qalıb. Sənaye müəssisələrini alanların əksəriyyəti hökumət rəsmilərinə yaxın şəxslərdir.

 

N.S


HƏMÇİNİN OXUYUN

HƏMÇİNİN OXUYUN