Zəncanda avtobus sürücüləri etiraz aksiyası keçirib

Zəncanda avtobus sürücüləri etiraz aksiyası keçirib

GünAz TV: Zəncanda bir qrup avtobus və mikroavtobus sürücüsü Valilik binası qarşısında etiraz yığıncağı keçirib.

 

İyunun 19-da bir araya gələn sürücülər Neft Şirkətinin avtobuslara yanacaq verməsində tətbiq edilən dəyişikliyə etiraz edərək bunun qəbul edilməz olduğunu vurğulayıblar.

 

Bu barədə etirazçılardan biri “Fars” xəbər agentliyinə açıqlama verib: “Buraya toplaşmağımızın iki əsas səbəbi var. Biri Neft Şirkətinin avtobuslara verdiyi yanacaqla bağlı yeni qaydalar tətbiq etməsi, digəri avtobusların Taksi Servis Şirkətinin nəzarəti altına verilməsidir. 

Neft Şirkəti Təbriz, Urmiyə və Tehranda əvvəlki qaydada işləyir, lakin Zəncanda yeni qayda tətbiq olunur. Artıq Zəncanda bir neçə nəfərin yanacaq kartı da ləğv edilib. Onlara bildirilib ki, siz yenidən qeydiyyata alınmalısınız və Taksi Sirvisi Şirkəti sizin maşına GPS sistemi quraşdırmalıdır.”

 

O sözlərinin davamında deyib: “Neft Şirkəti qət olunan məsafəyə uyğun olaraq yanacaq vermək istəyir. lakin biz deyirik ki, bizim yanacaq kartımız var və nə qədər yanacaq məsrəf etdiyimiz də bəllidir. Biz artıq yanacaq almırıq, əgər kimsə yanacaq qaçaqmalıçılığı ilə məşğul olur, ona qarşı tədbir alınsın.

Ümumiyyətlə Zəncanda yanacaq qaçaqmalçılığı yoxdur. Belə iddialar gülünc və yanacaq kartını ləğv etmək üçün bəhanədir”- deyə zəncanlı sürücü qeyd edib.

 

Xəbər agentliyinə danışan şəxs keçirilən yığıncağın digər səbəbini də açıqlayıb: “Avtobusları Taksi Servis Şirkətinin nəzarəti altına verirlər. Yeni şirkət bunun üçün 150 min tümən nağd pul və 15 milyon tümənlik mülki vəsiqə tələb edir. Bu işin mürəkkəb idari bürokratiytası var və problemdən başqa heç nə deyil”- deyə o vurğulayıb.

 

Etirazçı sürücü bu layihənin sadəcə Zəncanda həyata keçirildiyini xatırladaraq əlavə edib ki, bu iş çoxlu sənəd və vəsait tələb edir və müşahidələr göstərir ki, gələcəkdə daha çox vəsait tələb olunacaq. “Bizim özümüzün dərnəyimiz var. Məsullar isə tələb edir ki, biz Taksi Servis Şirkətinin nəzarəti altında fəaliyyət göstərək və bu şirkətin vasitəsi ilə müxtəlif orqanlarla müqavilə bağlayaq. Biz nəyə görə öz müstəqil fəaliyyətimizi itirməliyik”- deyə o bildirib.

 

N.S


HƏMÇİNİN OXUYUN

HƏMÇİNİN OXUYUN