Ərdəbildə azərbaycanlı məhbus Siyamək Mirzayiyə dəstək məqsədilə divarlara şüarlar yazılıb

Ərdəbildə azərbaycanlı məhbus Siyamək Mirzayiyə dəstək məqsədilə divarlara şüarlar yazılıb

GünAzTV: Güney Azərbaycanın Ərdəbil şəhərində milli zəmində apardığı dinc fəaliyyətinə görə Tehranın Evin zindanında saxlanılan tanınmış fəal Siyamək Mirzayiyə dəstək məqsədilə küçə divarlarına geniş şüarlar yazılıb.

 

Məktəblərin və hökumət idarələrin divarlarına türk və fars dillərində geniş şəkildə yazılan “Yaşasın Siyamək Mirzayi”, Azərbaycanın igid oğlu Siyamək Mirzayi azad olsun”, “Siyamək Mirzayiyə azadlıq” və “Siyamək Mirzayi azadlığa buraxılmalıdır” şüarlarda dinc fəala dəstək nümayiş etdirilməsi ilə yanaşı onun həm də dərhal azadlığa buraxılması tələb edilib.

 

Xatırladaq ki, “ETTELAAT” əməkdaşları,  36 yaşlı Siyamək Mirzayini, 2016-cı il, iyulun 14-ü axşam saatlarında Ərdəbilin yaxınlığındakı Parsabad şəhərində, şəxsi ərzaq mağazasında tutublar. Tutulduqdan sonra, o əvvəlcə ETTELAAT-ın yerli idarəsinə aparılsa da, sonradan Tehranın Evin zindanına köçürülüb. O, hazırda həmin həbsxananın 8-ci korpusunda saxlanılır.

 

Tehran məhkəməsi, azərbaycanlı fəalı ölkənin milli təhlükəsizliyinə qarşı çıxmaq niyyəti ilə qanunsuz qurum yaratmaqda günahlandırılaraq, onu 10 il həbsə və 2 il Cənubi Xorasan əyalətinin Təbəs şəhərinə sürgünə məhkum edib.

 

Siyamək Mirzayi bir neçə gün əvvəl Tehran prokurorunun müavini Hacı Muradiyə məktub yazaraq Apellyasiya Məhkəməsində onun işinə (dosyesinə) yenidən baxılması prosesinə mane olan kənar qüvvələrdən gileylənib. Məktubunda qanunsuz həbsinə etiraz bildirərək saxlanma şəraitini açıqlayan və müvəqqəti azadlığa buraxılması qarşılığında məhkəmənin ETTELAAT əməkdaşlarının təzyiqi ilə ailəsindən ağır mülki vəsiqə girovu tələb etməsinə toxunan Siyamək Mirzayi, barəsində irəli sürülən bütün ittihamları əsassız sayaraq rədd edib.

 

Bundan əvvəl fəalın Apellyasiya Məhkəməsinin mayın 17-də keçiriləcəyi bildirilsə də, həmin gün, onun işi (dosyesi) məhkəməyə təqdim edilmədiyinə və digər naməlum səbəblərə görə məhkəmə iclası yenidən təxirə salınıb. Məhkəmənin dəqiq vaxtı barədə hər hansı bir məlumat verilməyib.

 

 

 

 

 

 

 

 

 

A.M


HƏMÇİNİN OXUYUN

HƏMÇİNİN OXUYUN