آخرین خبرها

ایکی تیر، صمد بهرنگی‌نین دوغوم گونو و یاندیریلان امامیه قبریستان‌لیغی - ابراهیم ساوالان

۱۴۰۳.۰۴.۰۲, ۰۹:۱۰
ایکی تیر، صمد بهرنگی‌نین دوغوم گونو و یاندیریلان امامیه قبریستان‌لیغی - ابراهیم ساوالان

ایکی تیر، صمد بهرنگی‌نین دوغوم گونو و یاندیریلان امامیه قبریستان‌لیغی - ابراهیم ساوالان

Gunaz.tv

دؤردونجو آیین ایکیسی صمد بهرنگی‌نین دوغوم گونودور و او گون امامیه قبریستانینا گئده‌جکدیم. آما امامیه قبریستانی فقط پنجشنبه‌لر آچیق اولور و من دونن او مزارلیغا باش ووردوم.

 

تبریزین قبریستانلاری دا پیس گونه قالیب. او قبریستانین سوروملولاری، اوردا بیتن تیکانلاری تمیزله‌مک اوچون قبریستانا اود ووروموشدولار و قبریستان آلوو آلوو یانیردی. مظفرالدین شاهین کوره‌کنی و بو قبریستانین واقیفی اولان میرزا کاظم سید امامی بیر بوجاغا سیخیلیب، خیسین خیسین آغلاییردی. البته بیلمه‌دیم میرزا کاظم قبریستانین حالینا آغلاییردی یوخسا نوه‌سی کاووس سیدامامی‌نین ائوین بازداشتگاهیندا اؤلومونه.

 

شانلی فریدون ابراهیمی‌نین ده قبرینه باش ووردوم. اونون سینداشی آلوودان قیپ قیرمیزی اولموشدو. قیشین سویوق بیر گئجه‌سینده تبریزده اعدام اولان فدایی‌لرین ده قبرینه باش ووردوم. قبیر داشلاری اود ساچیردی و سوموکلری هله ده اوشویوردو. مقدس سیدلرین ده مزاری یانیردی و نئچه دؤولت آدامینین مزاری باتمیشدی.

 

اؤولادیمیزین مسکنی و اجدادیمیزین مدفنی اولان بو تورپاق، اود توتوب یانارسا، آغاسی دا یاناجاق قاراسی دا یاناجاق و کیمسه گله‌جک فاجیعه‌لردن یاخاسینی قورتارماغا ناییل اولمایاجاق. ان آزی امامیه‌ده یاتان فداییلرین روحلاری آزاددیر، بئله گئدرسه بیزیم کیمی وطنی داغیلمیشلارین، روحلاری دا سرگردان قالاجاق.

 

گونازتی‌وی

SH.A

Similar News

اخبار منتخب

Most Read