۸ مارس دونیا‌ قادینلار گونو‌ موناسیبتی‌ ایله‌ باغلی ائوین‌ دوستاغیندان‌، آزربایجانین‌ سیاسی‌ محبوسلاری «محمود اوجاقلو‌» و‌ «مرتضی پروین» بو‌ گونو‌ قوتلایاراق آزربایجان‌ قادینلارینا‌ تبریک‌ دئییب‌ و‌ اونلاردان‌ اؤز حاقلاری اوستونده‌ چالیشمالارینا‌ گؤره‌ تشککور‌ ائدیب‌‌لر.

 

دونیالیق قادین گونو اینسانلار و دؤلت‌لر آراسیندا سمبل کیمی‌ خانیملارین‌ حاقلاری اوسته‌ موباریزه‌ و تلاشلارینینی خاطیرلاماق و آغیرلاماسینا‌ گؤره‌ سئچیلیب‌ دیر؛ کی بیلدیرسین هر اینسانین‌ آلین‌ یازیسی، یاشادیغی آدلا بیردیر‌ و‌ سونوجدا‌ عئینی دیر.

قادینلار دونیاسیندان‌ سؤز آچاندا‌ اوزاق‌ و‌ آیری‌ دونیادان‌ سؤز‌ گئتمیر.

 

هر ائوده یاخین‌ کیمسه‌لریمیزلردن‌ یعنی آنا، باجی، حیات‌ یولداشی‌ و‌ قیزلاریمیزلا یاشایان اینسانلاردان‌ دانیشیریق. بونلار بیزیم مهریبان، گؤزل، اوره‌یی‌ یانان‌، دیرلی وارلیقلار و‌ سئوگی بولاقلاری دیرلار.

 

بو‌ گون‌ اولدوغوموز‌ موقعیت‌ ده‌ اقتصاد، کولتورل، سیاست، ائیتیم‌ و‌ اینانجلار هر آن دییشمک‌ده‌ و‌ گلیشمک‌‌ده‌ دیر.

 

بئله‌لیکله‌ اینسانلار آراسیندا اولان‌ ایلگی‌لر و‌ باغلانتی لارادا‌ اثر قویور.

 

بونا‌ گؤره لازیم گؤرونور‌ خانیم، کیشی‌ و‌ اجتماعی اینسانلار‌ چییین‌ - چییینه آیاق ـ آیاغا‌ بیرلیکده گله‌جه‌یه‌ دوغرو چالیشمالارینا‌ دوزگون یوللاری تاپیب‌ و‌ اللریندن‌ گلن‌ قدر اؤز باشاریلارینی‌ و‌ باجاریقلارینی‌ گلیشدیرسینلر‌.

 

اینسانلارین‌ اؤز‌ کیملیک‌لرینه‌ باغلی اویغون‌ حاقلاری وار، واردیر‌ دئمکده‌ یعنی‌ تام‌ دوغال و طبیعی حاقلار ائیتیم، شادلیق، سئوینج، سئوگی‌، ایشه قازانج و آیری‌ سوروملار، گئیب‌ سئچمه، بوشانما‌ و... مدرن و مدنی دونیادا‌ ایلکین‌ حاقلار‌ی ساییلیر.

 

ایران‌دا‌ ائتنیک‌لره‌ منصوب‌ اولان‌ خانیملارین‌ نقلی‌ باشقا‌ حاقی‌ کیملیک مسئله‌سی دیر‌، دئمک‌ اولور اوسته‌ و‌ورغولادیغیمیز‌ حاقلار کیملیک‌ مسئله‌سی اوستونده‌ قورولور.

 

آزربایجان‌ خانیمی اؤز دیلینده‌ و‌ اؤز تعریفی ایله اؤزونه‌ مخصوص حاقلاری تانیملاییر.

 

یورد و کیملیک‌ اینسانین بیرلیگینی‌ و‌ یاشامینی‌ بیر بدن اولاراق و اجتماعی بدن‌لرین‌ توپلامی‌ کیمی‌ گئرچکشدیریر.

 

ییه‌لیک‌ «مالکیت» اؤنجه‌ بدن‌ دن‌ باشلار‌ و هابئله اجتماع‌ و شخص بدنلرینی ساغلام‌ و بئجه‌رمسینه‌ گؤره حاقلاری‌ و‌ منفعت‌لری تانیتدیرماق و‌ تانیماق‌ هر‌ کیمین‌ وظیفه‌سی و‌ بیر بیریمیزین بورجوموزدور.

 

باشاریقلی‌ و‌ موفق عاییله‌‌لر و‌ اجتماعلارا‌ باخاندا‌ گوجلو‌، مستعد‌ و بئجه‌ریکلی خانیملاری گؤروروک‌ خانیملار اؤزلری یوخسا‌ آیریلاری‌ یارادان فرصتدن‌ فایدالاناراق اولدن‌ اؤزلرینی‌ و‌ سونرا‌ ارلرینی‌ ـ اوشاقلارینی‌ داها‌ گوجلو و‌ دیرلی اینسان‌ کیمی‌ گلیشتیرمه‌لی باشاریرلار. بیز میللی‌ چالیشقان اولاراق‌ آنا‌ یوردوموزلا‌ باغلادیغیمیز‌ ایلقاری وورغولایاراق‌ خانیملارین‌ حاق‌ سسینه‌ سس قاتیریق‌. بو‌  سس‌ ایندی‌ زینداندان‌ یاییلیر. بیز بیلیریک اجتماع‌ میزدا اولان‌ آنا‌، باجی‌ و اؤز‌ حیات‌ یولداشیمیز‌ داها‌ چوخ‌ اینجییرلر‌.‌ اؤلکه‌‌نین‌ و‌ اقتصادین چتین شرایطی‌ هامیدان‌ چوخ‌ خانیملارا منفی‌ ائتگی‌ بوراخیر‌ سوندا‌ اؤزللیکله‌ اؤز‌ عاییله‌لریمیزده‌ کی خانیملاردان‌ عوذر‌ ایسته‌ییریک، عوذر‌ ایسته‌مک‌ بیزیم گؤره‌و‌ دیر آنجاق اومود‌ واریمیز قادینلار‌ گوندن‌ گونه‌ گوجله‌نرک‌ یوردوموزون‌ قورتولوشا و میللتیمیزین‌ گلیشمه‌سینه‌ بؤیوک‌ عامیل‌ کیمی چالیشمالارینی‌ بیلدیریک‌ بو‌ یول‌ دا هامیمیز‌ برابرلیگه‌ و‌ آزادلیغا‌ ایناناراق یول‌‌بیر‌ و‌ سؤز‌ بیریک.

یاشاسینلار‌ حاق‌ اوسته‌ چالیشان‌ خانیملار.

»محمود‌ اوجاقلو» ـ «مرتضی پروین‌ جدا‌»

ائوین‌ دوستاغی - ۱۴۰۳/۱۲/۱۷

 

گونازتی‌وی

SH.A