سمبولیک اقتدار / سیامک میرزایی

آخرین خبرها

سمبولیک اقتدار / سیامک میرزایی

۱۴۰۴.۰۳.۱۵, ۱۳:۳۶

Gunaz.tv

اقتدار عربجه قدر کلمه‌سیندن تؤره‌نن و قدرت کلمه‌سی ایله یاخین اولان کلمه‌دیر.

گئنل اولاراق گوج، قوت، ارک و سلطنت آنلامینی داشییان اقتدار، بیر شخص و یا گروپون باشقالارینی ائتگیله‌ییب کنترل ائتمک گوجونه دئییلیر.

بو گوج، فیزیکی قووه، اجتماعی استاتوس(جایگاه اجتماعی)، بیلگی، شبکه و قانونلارا دایاناراق اویغولانا بیلیر.

سیاست دونیاسیندا ایسه سیاسی گوجو الده ائدن گروپ و یا پارتییایا(حزب) اقتدار دئییلیرکن اونلارین قارشیسیندا اولان گروپ و پارتییایا ایسه مخالفت دئییلیر.

ماکس وئبئر اقتداری، باشقالارینا تحمیل ائدیلمیش گوج کیمی تانیماقدادیر. اونون نظرینه گؤره اقتدار ۳ شکیلدن اولوشور.

گله‌نکسل اقتدار(اقتدار سنتی)، کاریزماتیک اقتدار و قانونی اقتدار.

فوکو-یه گؤره ایسه اقتدار هانسیسا سیاسی قورومدان عبارت دئییل بلکه اوجو-بوجاغی گؤرونمز و بیلینمز بیر شبکه‌دن عبارت‌دیر.

بیرچوخ دوشونورلرین فیکرینه گؤره ایسه گئنل اولاراق اقتدار اوچ اساس قایناق و ایلکه‌یه دایانماقدادیر.

.فیزیکی اقتدار(پلیس، اوردو، محکمه و..)

.اقتصادی اقتدار(ماددی، مالی و امکان‌لار)

.سمبولیک اقتدار.

بوردا فیزیکی و اقتصادی اقتدار قایناقلارینین اوزرینده دئییل، بیراز سمبولیک اقتدار حاققیندا آچیقلاما وئریلیر.

پییئر بوردیو-یه گؤره سمبولیک اقتدار گؤرونمه‌ین و درک ائدیلمه‌ین بیر اقتدار نؤوعودور و توپلوم یاپیسی(ساختاری) و توپلوم ایلیشگیلری بو تور اقتدار ایله بیچیمله‌نیر.

باشقا دئییشله سمبولیک اقتدار، توپلوم اینسانلاری ایچینده اقتدارین مشروعیتی و قبول ائدیلمه‌سینی ساغلاییر.

داها دوغروسو ایسه اقتداری توپلومدا ایچسللشدیریر.

بیر باشقا دئییشله بو اقتدار واسیطه‌سیله توپلومو کنترل ائتمک و دوزن(نظم) یاراتماق اوچون، گرچکلیک قورولور، بیچیمله‌نیر و یئنیدن اوره‌تیلیر(بارتولید).

هابئله بو اقتدار، زور قوللانماق و گوج اویغولاماق ایله دئییل، بیر سیرا سمبل، ایمگه(تصویر)، قاورام(مفهوم)، روایت‌ و ذهنیت‌لر آراجی ایله ایشله‌مکده‌دیر.

سمبولیک اقتدار اوچ اساس تکنیک ایله اویغولانیر.

فیکیر آشیلاما، آلقی یاراتما پروپاگاندا(تبلیغات)

یؤنلندیرمه(اینسانلاری ایسته‌دیکلری سمته یؤنلتمه)

سمبولیک اقتدار، اقتدارین، اینسانلار ذهنینده دوزلتدیکلری دوغرولوق و گرچک روایت‌لر ایله ایشله‌‌ییر.

اوناگؤره ده اقتدار قایناغی و گوجونون ان اؤنملی بؤلومونو تشکیل ائتمکده‌دیر.

دولت‌لر بو قایناغا دایاناراق توپلوم اینسانلارینی ایسته‌دیکلری یؤنده بیچیملندیب ایلیشگیلرینی شکیللندیریب و اونلاری کنترل ائدیرلر.

یعنی بو مکانیزما اقتدارین ذهنی، ایدولوژیک و کولتورل زمینیندن(بستر) عبارت‌دیر.

دولت، الینده اولان بو گوجلو مکانیزما ایله

چوخ زامانلار یارادیلان آلقی و ذهنیت‌لرین گرچکلیک و حقیقتی داشیماماسینا رغما توپلومو ایسته‌دیکلری مساله‌لره ایناندیریب و ایسته‌دیکلری سمته یؤنلندیره بیلیر.

او اوزدن دولت‌لرین ان گوجلو قایناغی سمبولیک اقتداردان عبارت‌دیر.

سیامک میرزایی

گوناز تی وی

E. Y