اؤیرنجی سسی: اسماعیل برزگری و رسول حیدرزاده تبریزلی موزیسین‌لر ایکی ایل یاریم قاباق تبریزده توتولوب و تهراندا یئددی ایللیک حبس‌لرینی کئچیردیرلر. بونلار دا ائوین‌ین 350 بندینده اولانلارین چوخو کیمی قانون چرچیوه‌سیندن ائشیک یول‌لارلا سورغولانیب سونرا “محاکمه” آدلی بیراویوندا جزالانیبلار. برزگری و حیدرزاده بو عدالت‌سیزلیگه تکجه بیر سیلاح تاپیبنئچه یول آجلیق باشلاییبلار.

اؤزللیکله اسماعیل برزگری دفعه‌لرله آجلیق ائدیب و کئچن پاییزدا مریض‌خانادا دیش‌لری ده نئجه اولاراق سیندیریلیر! او، بو اعتصابی مریض‌خانادا اؤلوم آیاغیندا قورتاریب زیندانا قایتاریلاندا باشقاسی‌نین یاردیمی اولمادان آیاق اوسته دورا بیلمه‌ییردی. کئچن ایل قیشدا اؤز وضعیتینی زیندان مقام‌لارینا سؤیله‌ییب اونلاردان درمان امکان‌لاری ایسته‌دی. اونلار سؤز وئردیلر «هئچ اولماسا»دیش‌لرینی دوزلتدیرمه‌گه اونو مریض‌خانایا گؤندره‌جکلر. زامان کئچدی برزگری یئنه علاج‌سیز قالیب آجلیق باشلادی. بو یول خسته‌خانادا یئنه اونو دؤیوب قارنینا یئمک تؤکمک ایچین بوغازینی دا دلدیلر. سونرا بیر مدت اونو مریض‌خانادا یاتیردیب جانسیز جانینی زیندانا قایتاردیلار.

برزگری مکتوب‌لارینی و دیلکچه‌لرینی جاوابسیز گؤره‌رک یئنی‌دن آجلیق باشلاییب؛ ۱۷ گوندور یوخ اتینی اریدیب گون گله گؤزوموزون اؤنونده سولور. آرتیق دئیه بیلمه‌ییریک آجلیغینا سون گون اولسون بو گون! او گرک اولان امکانی ایسته‌ییر. زیندان وظیفه‌لیدیر محبوسو گرک اولان زامان مریض‌خانایا گؤندرسین. او مامورلار الینده سینان دیش‌لرینی دوزلتدیرمک ایسته‌ییردی. اصلینده کئچن بیر ایلده برزگری یاخشیجاسینا دا یئیه بیلمه‌ییردی. آغزیندا بیر نئچه دیش‌دن باشقا دیش قالماییب. اوبیری طرفدن اوندا یارانان اعصاب مریضلیگی ده زیندان‌دان ائشیکده درمان اولونمالی‌دیر. زیندانین معتمد دوکتورلاری و «پزشکی قانونی» برزگری‌نین حبس چکه بیلمه‌دیگینه قرار وئریب مکتوب اولاراق زیندانا بیلدیریبلر.

نه اولور بو قدر شکنجه و حبس‌دن سونرا دوستاغین طاقت‌سیز و مریض جانینی دا بوشلاماییرلار؟

اسماعیل برزگری بو اؤلکه‌نین قانونلارینا دایاناراق آزاد اولمالیدیر. دوکتورلار بو قانونون اساسینا آزادلیق حؤکمونو وئریبلر. اسلام جمهوریتی دؤولتی «اسماعیل برزگری» و یولداشی «رسول حیدرزاده»-یه گؤره سوروملودور. بو صنعتچی‌لرین باشینا نه گلیب گلسه گوناهی بو دؤولتین بوینونادیر. هر حالدا چتین بیر وضعیت‌دیر. دؤولتی تانیریق. توپلوم گوجوگوج گلمه‌سه سوروملولوغوندان قاچاجاق. ملتین سسی و گوجونو گؤزله‌ییریک. آذربایجان صنعتچی‌لری، موسیقیچی‌لری، یازیچی‌لاری و بوتون خالقیمیز بالاسی‌نین سسینی ائشیتمه‌لیدیر.

یولداش‌لار!

گئج اولمامیش سسیمیزی خالقین قولاغینا چاتدیرین. بیر صنعتچی‌میز اؤلوم آیاغیندا. اونون مدافعه‌سی هامیمیزین بورجودور.

زندان اوین

 ۲۰/ ۸/ ۹۲

سعید متین‌پور

گوناز تی وی

R.C