گوناز تی وی: حسن بئی راشدی: تبریزده تشییع جنازه مراسیمینه قاتیلماغا گؤره بیزی زنجاندا توتوقلادیلار!

آذربایجانین افتخاری، میلّی یولدا صداقت و صمیمیت ایله چالیشان و نهایت یکشنبه گونو 3 تیر 1397 تاریخینده دونیاسینی دگیشیب ابدیّته قووشان و دوشنبه گونو گون‌اورتادان قاباق 4 تیر 1397 تاریخینده تبریزده و «وادی رحمت» مزارلیغیندا تشییع جنازه مراسیمی نظرده توتولان شرفلی انسان رحمتلیک «حسن آذربایجان - دمیرچی» نین تشییع مراسیمنه قاتیلماغا 32 ایللیک دوست و فیکیرداشیم سایین اکبر آزادلا بیرلیکده گئتمه یی نظرده توتدوق.

مراسیم، دوشنبه گونو ناهاردان قاباق اولدوغونا گؤره یکشنبه، گئجه یاریسی حدودو تهراندان تبریزه حرکت ائتمه‌لیدیک لاکین من گئجه‌لر سوروجولوک ائده بیلمه‌دیگیمه، داها منیم ماشینیملا گئتمه‌کدن منصرف اولوب اوتوبوس یا باشقا بیریسی اؤزل مینیک ماشینلا مراسیمه گئدرسه بیزده اونلارلا بو سَفَره چیخماغی پلانلاشدیردیق.

کرجدن، بیر مینیک ماشینلا مراسیمه گئدیله‌جه‌یین و یئرلری‌نین اولدوغودا خبر وئریلدی. نهایت بللی اولدو کرجدن گئدن مینیک ماشین تانینمیش میلّی دوشنجه‌لی «توران خانیم ( خدیجه هژبر)» و اونون حیات یولداشی سایین «بهرام سعادتی» گیلدیر.

گئجه یاریسی حدودو کرجدن حرکت ائدیب بیر نئچه ساعات یول گئتدیکدن سونرا زنجان شهرینه چاتیب زنجان - تبریز یول عوارضی سیندن قاباق «گون آی» آدلانان پمپ بنزین محوطه سینده بیر - ایکی ساعات استراحت ائتدیگیمیز زامان تصادف اوزه‌رینده بو مکاندا بهنام شیخی و یونس رحیمی گیل ایله قارشی- قارشییا گلدیک. اونلاردا ماشینا بنزین آلدیقدان سونرا تصادف اوزه‌رینده بیزی بوردا گؤردوکلرینی سؤیله دیلر.

یولوموز بیر اولدوقدان بیر - بیریمیزین آردیندان حرکت ائدیب ساعات 4:30 - 5:00 حدودو زنجان- تبریز عوارضی‌سینه یاخینلاشاندا و ماشینین سرعتی آزالیب دایاندیغی زامان بیر نفر بیزیم ماشینا یاخینلاشیب بیزلره دیقّتله باخدیقدان سونرا سرعتله عوارضی کئچیدینه یاخینلاشیب یولداشلاری ایله بیرلیکده ماشینی دایاندیردیلار!

آدلاریمیزی دئییب ماشیندان آشاغا گلمه ییمیزی ایسته‌ییب ماشینین صاندیغینی یوخلادیلار. ماشیندا چادیر، پتو و ماشینا لازیم اولان وسائیل‌لردن باشقا یالنیز بیر شئی اونلارین نظرینی چکدی!

« چاپ اولموش بیر بَنئر یازیسی»!

بلکه باشقا بیر شعار یازیلمیش اولسون بورادا، اونو هیجانلا اوخودولار! منیم طریقیم‌له یازدیریلان و من‌له اکبر آزادین طرفیندن رحمتلیک «حسن آذربایجان»ین ابدیته قووشماسی اوچون تورکجه تسلیت یازیسی اولدوغونو گؤردوکده دئدیلر: « تسلیت یازیسی دیر». یعنی اؤنملی بیر شئی دئییل.

گؤزلریمیزه گؤز قاپاغی (چشم بند) ویریب ون ماشینینا اوخشار بیر ماشیندا اوتوردوب زنجان ایچینه و بیر بازداشتگاها آپاردیلار. البته بونودا دئمه‌لییم کی، دوارانمالاری منصفانه و حتی محترمانه ایدی.

گؤزلریمیزه گؤز قاپاغی ویرماغی‌دا «چشم بند فقط بو اطرافی تانیماماق اوچوندور»  دییه ایضاح ائدیردیلر. نهایت،بازداشتگاهدا نییه تبریزه و بیر تجزیه طلب‌دن حمایه ائتمک اوچون اورا گئدیرسینیز؟ و بونا اوخشار سورغولار ائدیب، جاوابدا رحمتلیک حسن آذربایجان تجزیه طلب یوخ هویت طلب و حق طلب ایدی یازیلاری آلدیقدان و تقریبا 14 ساعات سونرا دوشنبه 4/4/ 1397 آخشام اوستو ساعات 7 حدودو هر 6 نفریمیزی آزادلیغا بوراخدیلار؛ یالنیز منیم و سایین بهرام سعادتی‌نین جیب تئلفونلاریمیزی ساخلاییب دئدیلر: «سونرا خبر وئره ریک گلیب آلارسینیز!»

منیم ساخلانیلان موبایلیمدا طبیعی کی،«یوردداش https://t.me/yurddash » تلگرام کانالیم، شخصی تلگرام حسابیم و اینستاگرام اکانتیم واردیر. آمما من بو یازینی«دئسک تاپ» حسابیمدان بورادا پایلاشیرام.

بو توتوقلامانین نه دلیلی و اونلارا نه فایداسی واریدی بیلمه‌دیم؟ اگر بو توتوقلاما اولماسایدی بیزده تشییع مراسیمینه قاتیلان باشقا مینلر انسانلارین بیریندن اولاجاقدیق؛ آمما ایندی جمهوری اسلامی‌نین آنا یاساسی‌نین 15 - جی ماده‌سی‌نین اجراسینی و 32- 35 میلیون ایراندا یاشایان تورک و مسلمان انسانی‌نین 150 مین نفر ارمنی‌لر قدری آنا دیلده درسی‌نین اولماماسی و بو حقوقو ایسته‌ینلری‌نین وفاتی زمانی حتی اونلارین تشییع جنازه مراسیمینه گئدنلرین بیر عده‌سی‌نین قارشیسی آلینماسیندان اجتماعی شبکه‌لرده یازی و سؤز- صحبت گئدیر و منجه بیزی توتوقلایان سیستیمه بونون هئچ بیر قازانجی یوخدور!

حسن راشدی 5 تیر 1397

گوناز تی وی

E.Y