بو گۆنلر میللتیمیزین دیرلی ائولادی عباس بی لسانی نین درمانی مرخصی سی محکمه طیب حؤکمۆنۆن قرارینا باخمایاراق، اردبیل دادستانی طرفیندن لغو ائدیلیب؛  بو عزیز سوْیداشیمیز زیندانا گؤندریلدی.

 

ایران آدلانان اؤلکه ده حاکمییتین ان ده یرسیز سایدیقلاریندان بیری اینسانلارین حیاتی دیر.

 

اؤزللیکله عباس بی لسانی کیمین رژیمین غضبینه توش گلن اینسانلارین حیاتینا دا توش گلمه سین؟ عباس بی حاکمییتی سارسیدان فعالییت لرینین آرتیق دؤردۆنجۆ اوْن ایللیینده دیر.

 

جیسمی دورومو خسته لن سه ده، روحو دورومو یوْرولمادان، سارسیلمادان داها کسگین، داها جیددی ایلک فعالییته باشلادیغی دورومدادیر.

 

او، یوردوموزدا سمبولا چئوریلمیش بیر میللتچی دیر. بو ایسه حاکمییتین غضبینه توش گلمک دیر. یعنی ایشکنجه، زیندان، سۆرگۆن و... هله بونلار اوْلا-اوْلا میللتچی ماسکاسینی تاخان، حاکمییتین یاراماز ال آلتیلاری، آیاق آلتیلاری طرفیندن تؤهمتلره، چئشیدلی دامغالارا معروض قالماق دیر.

 

«سنه بیر داش آتار یئریندن دوران».

میللتچی اوْلماق بو تیکانلی - داشلی یوْللاردا، میللتی نین گؤرن گؤزۆ، سئون اۆره یی، دۆشۆنن بئینی اوْلماق دیر.

 

میللتچی اوْلماق دیلیمیزی، وطنیمیزی و میللتیمیزی سئومک؛ اوْنلاری بو اؤلۆمجۆل دورومدان قورتاریب، یارارلی دوروما گتیرمک.

 

هر هانسی بیر میللتین یئترینجه میللتچیسی اوْلمازسا، میللت، اوْنو فاجعه ایله اؤزللشدیره جک قورودولان گؤلۆنۆ، محو اوْلان دیلینی، کیملییی نین آلچالدیغینی گؤره بیلمز. گۆنۆ- گۆندن اؤزگه لشیب باشقا میللت لرین قولو، کؤله سینه چئوریلر.

 

یاشاسین عباس بی کیمی میللتچیلریمیز و میللتچیلریمیزین ایدئاللاری اساسیندا فوْرمالاشان میللتیمیز، دیلیمیز، وطنیمیز.

 

سؤزۆمۆن سونوندا، عباس بی یه و حؤرمتلی عاییله سینه ساغلاملیقلا یاناشی پارلاق گله جکلر آرزولاییب؛ دیلیمیزه چئویردییم «شاندرو پتوفی»-نین « ایت لرله قوردلار ماهنیسی» آدلی شعرینی تۆرمه ده عباس بی ین سارسیلماز ایراده سینه سوْنورام.

 

ایت لرله قوردلارین ماهنیسی

قیش دیر، قار اله نیب یئر اۆزه‌رینه،

اؤلۆم داغا، داشا، تپه‌یه قوْنوب.

گۆنش اوزاقلاشیب، ایزی قالماییب،

چؤلده آخان سولار شاختادان دؤنۆب.

 

ایستی یووامیزدا مۆرگۆله ییریک،

شیپ-شیرین بیر یوخو گؤزلره چؤکۆب.

سئویملی ییه میز ، گۆنده کی کیمی،

سۆفره نین آرتیغین بیزلره تؤکۆب.

 

شاللاقلار نه قدر آجی اوْلسادا،

کؤتک یئمک بیزه بیر عادت اوْلوب

اعتراض ائتمریک اربابا، آنجاق

اوْنون آرتیغییلا قارنیمیز دوْلوب

 

اربابین‌ غضبی‌ یاتاندا‌ قاچیب

توْزلو‌ چکمه لرین‌ یالاییریق‌ بیز

اوْدا‌ رحمه‌ گلیب‌ گۆلۆمسه‌ینده

آجی شاللاقلاری‌ اونودوروق‌ تئز

 

قوردلارین‌ ماهنیسی

قیش دیر، قار‌ اله‌ نیب یئر‌ اۆزرینه

اؤلۆم‌ داغا‌ داشا‌، تپه یه‌ قوْنوب‌

گۆنش اوزاقلاشیب‌ ایزی قالماییب‌

 

چؤلده‌ آخان‌ سولار‌ شاختادان‌ دؤنۆب

قاسیرغالی، قارلی قیش سازاغیندا

نه‌ بیر‌ یووامیز‌ وار‌ اوْرا‌ ییغیناق

هر‌ یانا‌ باخیرسان‌ قاردی‌ تپه‌ دی‌

نه‌ ده‌ بیر‌ سیغیناجاق، اوْردا‌ سیغیناق

 

ایچیمیزده‌ آجلیق‌ ائشیکده‌ ساختا

بیر‌ بونلاردیر‌ بیزی‌ تنگه‌ گتیرن

بیرده‌ کی‌ آلوولو‌ ایستی‌ قورغوشوم

اؤلۆم‌ سرحددینه بیزی‌ یئتیرن

قیرمیزی‌ بوْیانیر‌ قار‌ قانیمیزلا

 

بو‌دور‌ داغ‌ تپه‌ ده‌ بیزدن‌ قالان‌ ایز

قیرمیزی‌ بوْیانیر‌ قار‌ قانیمیزلا

بودور‌ بو‌ اؤلکه‌ ده‌ بیزدن‌ قالان‌ ایز

یاشاماق‌ نه‌ قدر‌ چتین‌ اوْلسادا

آزادلیق‌ سرحددین‌ قوْرویانیق‌ بیز

 

گونازتی‌وی

SH.A