مهرداد کرمي‌نين قانونسوز توتوقلانماسيندان سون خبرلر مهرداد کر‌مي حاقيندا حاکيمين مهرداد بَي‌ين واليدئين‌لرينه وئرديیي جاواب: " تکجه بونو دئيه بيلريک کي، ساغدير، بو قدر"! 28 دئکابر 2011

مهرداد کرمي‌نين- اؤيرنجي آکتيويست و اينسان حاقلاري چاليشقاني- قانونسوز توتوقلانيلماسيندان 6 گون کئچمه‌سينه باخماياراق، حاکيم، مئهرداد بَي‌ين واليدئين‌لرينه سؤيله‌ميش کي: تکجه دئيه بيلريک، ساغدير و باشقا هئچ بی سوالينيز اولماسين. اونون ايستينطاق و حاقيندا تدقيقات بيته‌نه قدر گؤزله‌یين". مهرداد کرمي‌دن – تبريز اونيوئرسيته‌سي‌نين زنگانلي اؤيرنجيسي- سون خبرلر بوندان عيبارتدير کي، مهراد بي‌ين عايله‌سي هر گون اوغوللاري‌نين دوروموندان خبر بيلمک اوچون زنگان محکمه‌سينه باش وورورلار، آما بوتون بونلارا رغمن بللي بير جاواب آلا بيلمه‌ميش‌لر. مهرداد کرمي‌نين آتاسي، مهرداد بَي‌ين دورومو اوچون حاکيمدن سوروشدوغوندا حاکيمين وئرديیي جاواب اونو اولدوقجا چوخ ناراحات ائتميشدير. حاکيم، عليشاهي مهرداد بَيين توتوقلانما سببي، اينديکي دورومو و ساخلانيلديغي يئر حاقيندا هئچ بير ايضاح وئرمه‌ميشدير و حاکيمين بئله داورانيشي، مهردادين اؤنجه‌کي توتوقلامالاردا شيددتلي ايشکنجه اولماسي ايله بيرگه، عاييله‌نين و تبريز اؤيرنجي‌لرينين نيگارانليغيني داها دا آرتميشدير. مهرداد کرمي تبريز اونيوئرسيته‌سي‌نين ائلئکتريک موهنديسليیي اؤيرنجيسي و آذربايجان تانيتيم اوجاغي‌نين کئچميش کاتيبيدير. مهرداد بَي، مهر آيي‌نين اوچونجو گونو تبريز اونيوئرسيته‌سي‌نين يئمک سالونوندان اوغورلانميشدي کي، ايکي گون سونرا تئلئفون ائده‌رک تبريز ايطیلاعاتي‌نين تک‌آدامليق کامئراسيندا ساخلانيلديغيندان خبر وئردي. مئهرداد بي، او زامان حاکيم قراري اولمادان توتوقلانميشدي و توتوقلانديغيندا دا دؤيوله‌رک آپاريلميشدي. تبريز و زنگان ايطيلاعات ايداره‌سي، تبريز اونيوئرسيته‌سينين موحافيظه بؤلمه‌سي‌نين يارديمي ايله اؤتن اوچ آي ايچينده ميللي فعالي توتوقلاماق ايسته‌ميشديلر. بو ایستک‌لری، تبريز اؤيرنجي‌لرينين موقاويمتي ايله باش توتماميشدي. اينديکي دورومدا مهرداد بَي کرمي‌نين ساغليق دورومو و توتوقلانما ندني حاقيندا هئچ بير بيلگي الده يوخدور، آما احتيمال وئريلير مئهرداد بي، زنگانليلار طرفيندن اورمو گؤلو اوچون کئچيريلن ايمضا کامپانياسي و بو حاقدا زنگاندا اينسانلاري بيلگي‌لنديرمکله باغلي اولسون. بوندان اؤنجه ده مئهرداد کرمي‌دن باشقا؛ داوود خوداکرمي، جمال ريضايي و خليل غلامي توتوقلانميشديلار. مهرداد کر‌مي بو گونه قدر 3 دفعه ميللي و اؤيرنجيليکده اولان چاليشمالارينا گؤره توتوقلانميشدير. سون دفعه 1390-جي ايل، شهريور آيي‌نين 29-و ، اينديليکده ائوين زيندانيندا ساخلانيلان و 8 ايل زيندان حؤکمو وئريلميش، آذربايجان تانينميش ژورناليستي و اينسان حاقلاري چاليشقاني سعيد بي متين‌پورون آد گونو تؤرنيندن سونرا ايکي باشقا اؤيرنجي ايله بيرگه توتوقلانميشدي. بو اوچ گونلوک توتوقلامادا مئهرداد بَي، روحي و جيسمي ايشکنجه‌لره معروض قالميشدي.