بو باش‌لیق آلتیندا بایباک سیته‌سینده گؤردوگوم بیر خبری اوخودوق‌دان سونرا صبیر کاسام داشدی. قززه حاقیندا ۲ دقیقه‌لیک بیر فیلمین یاییلماسینی طرف‌سیزلییه ضد سایان بو قورومون مسئولونون گؤره‌سن ایکی هفته اؤنجه بو تئلئویزیونون باشلاتدیغی فارسجا پروگرامین ماهیتین‌دن و اونون آپاریجی‌لارینین کیم‌لر اولدوغون‌دان خبری وارمی؟ “دئموکراسی بوتون دردلرین درمانی‌دیر” شوعارینی دفعه لرله تیکرار ائتممین سببی اونا اینانجیم‌دان ایره‌لی گلمکده‌دیر. آنجاق اونا بیر طرف‌لی یول کیمی یوخ، قارشی‌لیق‌لی تارازلاشدیرما فلسفه‌سینه اویغون یاناشماق واجیب‌لیگینی BBC مسئول‌لارینین بیلینجینده اولدوغونا دا اینانماقدایام. قززه‌ده هلاک اولان‌لارین اؤزل‌لیکله گوناه‌سیز اوشاق و قادین‌لارین اؤلومو، بوتون اینسان‌لارین گؤز یاش‌لارینین سئله دؤنمه‌سینه سبب اولدوغو اینکار ائدیلمزدیر. آنجاق بو فاجعه‌نین اساس سببکاری، تئهرانین اؤلوم قوخان نفسی و اونون حمایه‌سین‌دکی آلدانمیش قروپ‌لارین خالقی سیپر ائده‌رک گویا ایسرائیلی دئنیزه تؤکه‌جک خولیاسیندا اولماسین‌دان ایره‌لی گلدیگی ده اینکار ائدیلمزدیر. فارس شووینیزمی داخیلی پروبلئم‌لرینی چؤزمک و اؤزل‌لیکله میللی فعال‌لاری ازمک اوچون بوتون اویون‌لارا باش ووردوغو بوتون دونیایا آیدین‌دیر. فیلیسطین دوگونونون آچیلماسیندا بیر مانعه‌یه چئوریلمیش بو گئرچه یی گؤرن مصر و اونا بنزر عرب اؤلکه‌لری‌نین اویونا جدی گیرممه‌لری‌نین، فیلیسطین خالقینا نه گتیرجه یی‌نین ده دوزگون ترزیده اؤلچولمه‌سی گرکن بیر آنتی دیردیر. بونا قارشی‌لیق، تئهرانین آغزی ایله دانیشمایا باش‌لییان بؤلگه‌دکی بعضی باش ناظیرلرینده، اومیدلریمیزی کسه‌رک احمدی نژاد سوییه‌سینه یئنمه‌سی آنلاشیلماز اولسا دا دوزگون دوروم دیرلندیرمه‌سینه ده یر بیر حادثه‌دیر. فیلیسطینین نجاتی، موسلمان‌لارین دینی دویغوسون‌دان سو ایستیفاده ائدیب میللت‌لری قارانلیغا سوروکلمکله دئییل، عقل لی سیاست‌لرله مومکون‌دور. اونا گؤره‌دیر کی، دئموکراسی‌دن دانیشان‌لار حقیقت‌لری گیزلتمکله دئییل اونون بوتون جهت‌لرینی دوزگون آچماقلا اینسانلیغا خیدمت ائده بیلرلر دوشونجه‌سینده‌یم. آما بو قیسا یازی‌دان اساس مقصدیم حاماس- ایسرائیل محاربه‌سی دئییل، بلکه BBC- نین فارسجا ائکرانا چیخاردیغی تک طرف‌لی پروگرامینا اعتراض ائده‌رک بوتون سویداش‌لاریمی اؤزل‌لیکله اینگیلتره‌ده یاشییان‌لاری بو گئدیشاتا سون قویولماسی اوچون فعالیته باشلاماغا چاغیرماق‌دیر. اعلان‌لارینی چوخ‌دان گؤردوگوم بو وئریلیش‌لرین باشلاندیغی ایلک گون، بیزلرده یارانمیش BBC اینانجینا گوونه‌رک گؤزلمه سونو، ایزلمه‌یه باشلادیم. آما تأسفله همین گون باشا دوشدوم کی “سانکی IRIB ایله بیرگه تئهران حاکیمیتی‌نین و فارس‌چیلیق سیاستی گودن اوزدن ایراق خاریج‌دکی دئموکرات‌لارین ۴۰-آ یاخین کانال‌لاری بس دئییلمیش، بیریده گمی ایله گلدی”. ایلک گون کوردچولوک تبلیقاتی ایله فارس‌چیلیق سیاستینی بیر بیرینه توخویا‌راق میللته یئدیرتمه‌لری BBC-یه یاخیشمشیان بیر شکیلده تظاهر ائتدیگی کیمی هله‌ده دوام ائدیر. ایرق‌چی و فارس‌چی‌لارین، گلدیک‌لری آتا یوردلاری اولان آفغانیستانا باغلانما چابا‌لاری و یا اورتا آسیا تورک دئولت‌لرینه تأثیر گوجونو آرتیرماق اوچون تاجیکیستانا کولتورل هوجوم‌لاری آنلاشیلان‌دیر. آما، BBC-نین بو سیاستی آنجاق اورادا چالیشان: ۱- خاتمی زامانی ایرانین ایسلامی ایرشاد ناظیرلیغی‌نین مطبوعات اوزره موعاوینی ” رمضان پور”. ۲- خطی هامییا آیدین اولان روز آنلاین سیته‌سی‌نین باش‌چی‌سی “مسعود بئهنود” ۳- آذربایجان میللی دیرچلیش گون‌لرینده آذربایجان میللی فعال‌لارینین علئیهینه دیشی‌نین دیبین‌دن چیخانی یازان و سؤیله‌ین “نیک آهنگ کوثر” آدین‌داکی شخصین حیات یولداشی خانیم” فرناز قاضی پور”. آرتیرماق لازیم‌دیر کی، بو شخص او کاریکاتورو چکن “نیما نئییستانی”دن حیمایه اوچون الین‌دن گلنی اسیرگمه‌ییب. ۴- پرده آرخاسی یؤنلندیریجی فارس شووینیزمی‌نین تانینمیش سیماسی ” شمس الواعظین”. کیمی اینسان‌لارین شووینیست تفککور چاپیندا چیزدیک‌لری دایره قورقوسونون نتیجه‌سی اولسا گرک‌دیر. منجه آمئریکانین سسی‌نین ترسینه اولا‌راق BBC اؤز مؤوقعینی قوروماق و قازانمیش آدینی ساخلاماق اوچون آذربایجانلی ‌لارین اعتراض سس‌لرینه اویغون جاواب وئره‌جک قدر عقل‌لی‌دیر. آمئریکانین سسینه ائدیلن اعتراضلار بؤیوک نتیجه وئرمه‌سه‌ده سایین ” باراک حسین اوباما” نین مظلوم‌لارا آرخا دوراجاغی سؤزلری و سئچکی عرفه‌سینده گونئی آذربایجان باره‌سین‌دکی دانیشق‌لارین‌دان فایدالانمالییق. عزیز دوستوم حؤرمت‌لی جناب دؤکتور احمد بی یزدانی‌نین ” آلمان – آذربایجان ” آکادئمیک‌لر قروپو آدین‌دان یازدیغی مراجعتی دقته آلا‌راق خاریج‌دکی بوتون میللی فعال‌لاریمیز قول‌لارینی چیرمالامالیدرلار. بو تئلئویزیون‌لار او دؤولت‌لرین حسابینا فعالیت گؤستردیگینه گؤره اورادا یاشییان بوتون میللت‌لر او جمله‌دن ۳۰ میلیون آذربایجان تورکونون ده بون‌دان فایدالانماسینین دئموکراتیک حاق اولدوغو وورقولانما‌لی‌دیر. بؤیوک رسول اوغلو ۲۷/۱/۲۰۰۹