İranın Azərbaycana Düşmənçilik Siyasəti: Məxfi Sənədin Şok Detalları

SON XƏBƏRLƏR

İranın Azərbaycana Düşmənçilik Siyasəti: Məxfi Sənədin Şok Detalları

2024.11.01, 15:20

Günaz.tv xəbər verir ki, bu məxfi sənəd, İran rejiminin Azərbaycan və Türk dünyasına qarşı düşmənçilik siyasətinin nə qədər dərin və sistematik olduğunu bir daha ortaya qoyur.

Gunaz.tv

2023-cü ilin iyun ayında İranın Kəşfiyyat Nazirliyi (“Ettelaat”) tərəfindən Prezident Aparatına təqdim edilmiş sənəd, ölkəmizə qarşı aparılan məkrli planların təfsilatını əks etdirir. Bu sənədin Albaniyada fəaliyyət göstərən müxalif kiber qruplar tərəfindən ələ keçirilməsi və yayılması nəticəsində İranın Azərbaycana qarşı hansı niyyətlər güddüyü daha aydın şəkildə məlum olub.

Sənəddə İranın Tehrandakı Azərbaycan səfirliyinə qarşı törədilən silahlı hücum və Azərbaycanın Milli Məclisinin deputatına qarşı edilən sui-qəsd hadisələrinə dair reaksiyaların Azərbaycanla münasibətlərin “yenidən müəyyənləşdirilməsi” üçün bir bəhanə olaraq istifadə edildiyi qeyd olunur. Bu, rejimin Azərbaycana qarşı aqressiv və təxribatçı mövqeyini bir daha təsdiq edir.

İran, Azərbaycan və İsrail arasındakı münasibətlərin zəif nöqtələrini təhlil edərək, bu fikir ayrılıqlarını daha da dərinləşdirmək üçün xüsusi planlar hazırlamağa çalışır. Azərbaycanda “İranfobiya”nı azaltmaq və əvəzində “İsrailfobiya”nı gücləndirmək rejimin əsas hədəflərindən biridir. Bu isə İranın öz təbliğat maşını vasitəsilə Azərbaycan cəmiyyətində müəyyən düşüncə formalaşdırmaq və ölkənin daxili işlərinə müdaxilə etmək niyyətini açıq-aşkar göstərir.

Hesabatda İran mediasına Azərbaycanın milli birliyini parçalamaq, xalqı hakimiyyətdən uzaqlaşdırmaq və ölkəni Rusiya ilə qarşıdurmaya gətirəcək təhlükəli bir mövqedə göstərmək üçün müəyyən istiqamətlər təqdim edilir. Azərbaycanı “2-ci Ukrayna” kimi təsvir etməyə çalışmaq, rejimin ölkəmizə qarşı düşmən mövqeyini ortaya qoyur. Bundan əlavə, Azərbaycanın “İrandan uzaqlaşmağa” meyilli siyasətini sionist müşavirlərin təsiri ilə əlaqələndirmək, İranın düşmənçilik dolu siyasətini açıqca nümayiş etdirir.

Bu sənəd, İran rejiminin Azərbaycanın müstəqilliyinə, ərazi bütövlüyünə və Türk dünyasına qarşı daimi düşmənçiliyini açıq şəkildə göstərir. Azərbaycan, İran rejiminin bu məkrli planlarına qarşı ayıq olmalı və beynəlxalq arenada İranın bu cür təxribatçı siyasətini ifşa etməyə davam etməlidir. Azərbaycanın güclü və müstəqil xarici siyasəti, rejimin bütün təxribatlarına qarşı sarsılmaz bir cavab olaraq qalacaq.

GünazTV