Azərbaycanın təhlükəsizlik orqanları 106 yaşında - İran təxribatlarına qarşı effektiv mübarizə!

SON XƏBƏRLƏR

Azərbaycanın təhlükəsizlik orqanları 106 yaşında - İran təxribatlarına qarşı effektiv mübarizə!

2025.03.28, 12:10

Azərbaycan təhlükəsizlik orqanlarının yaradılmasının 106-cı ildönümü tamam olur. Bu əlamətdar tarix öz başlanğıcını Azərbaycan Xalq Cümhuriyyətində dövlət təhlükəsizliyinin təmin olunması məqsədilə 1919-cu il martın 28-də kəşfiyyat və əks-kəşfiyyat xidmətinin yaradılmasından götürür.

Gunaz.tv

GünazTV xəbər verir ki, Azərbaycan Dövlət İnformasiya Agentliyi (AZƏRTAC) Azərbaycan təhlükəsizlik orqanlarının yaranma tarixinə və keçdiyi yola qısaca nəzər salır.

1919-cu il martın 28-də Azərbaycan Xalq Cümhuriyyətinin hərbi naziri Səməd bəy Mehmandarovun əmri ilə Hərbi Nazirliyin Baş Qərargahı nəzdində kəşfiyyat və əks-kəşfiyyat bölməsi təşkil edilib. Qurumun ilk rəhbəri Məmmədbağır Şeyxzamanlı, sonra isə onun qardaşı Nağı Şeyxzamanlı olub.

Sovet dövründə qurum əvvəlcə Fövqəladə Komissiya (ÇK) adlanıb, bir müddət Daxili İşlər Xalq Komissarlığının (NKVD) tərkibində fəaliyyət göstərib, sonra Dövlət Təhlükəsizlik Komitəsi təşkil olunub. Ulu Öndər Heydər Əliyev 1967-ci ildə Dövlət Təhlükəsizlik Komitəsinin sədri təyin edilməsi ilə Azərbaycanın təhlükəsizlik orqanlarının tarixində tamamilə yeni mərhələ başlandı. Ömrünün 25 ilini təhlükəsizlik orqanlarında fəaliyyətə həsr etmiş Ümummilli Lider Heydər Əliyev o illər ərzində təhlükəsizlik sistemində əsaslı dönüş yaradıb, milliləşdirmə siyasətinin əsasını qoyub və bu məqsədə nail olub. Bu siyasət sonralar müstəqil Azərbaycanda sabitliyin bərqərar olmasında müstəsna rol oynayıb.

Dövlət təhlükəsizliyi sahəsində ciddi keyfiyyət dəyişikliklərinə nail olunması Prezident İlham Əliyevin də diqqət mərkəzindədir. Dövlətimizin başçısı təhlükəsizlik məsələsinə hər zaman kompleks və sistemli yanaşıb, bu məqsədlə əsaslı struktur islahatları aparılıb. Bu islahatlar sayəsində təhlükəsizlik orqanlarının fəaliyyəti yeni müstəviyə qalxıb. Azərbaycan Prezidentinin 2015-ci il 14 dekabr tarixli Fərmanı ilə Milli Təhlükəsizlik Nazirliyinin ləğv olunaraq onun əsasında DTX-nin və Xarici Kəşfiyyat Xidmətinin yaradılması xüsusi xidmət orqanlarının fəaliyyətinin səmərəliliyini artırmağa, bu fəaliyyəti yeni dövrün tələblərinə uyğunlaşdırmağa və dövlət idarəetmə strukturunu təkmilləşdirməyə yönəlib.

GünazTV xəbər verir ki, Azərbaycan Respublikasının Dövlət Təhlükəsizliyi Xidməti (DTX) ölkənin milli təhlükəsizliyini təmin etmək və xarici təhdidlərin qarşısını almaq istiqamətində ardıcıl tədbirlər həyata keçirir. Xüsusilə İranın Azərbaycana qarşı təxribatçı fəaliyyətləri son illərdə genişlənmiş və DTX bu cür təhlükələrə qarşı qətiyyətli addımlar atmışdır.

2022-ci ilin oktyabr ayında DTX ölkə ərazisində İran xüsusi xidmət orqanları ilə əlaqədə olan geniş casus şəbəkəsini ifşa etmişdir. Əməliyyat nəticəsində onlarla şəxs saxlanılmış və onların dövlətə qarşı fəaliyyət göstərdiyi sübuta yetirilmişdir. “Meyse” və “Doktor” kod adlı casusların əsas məqsədi ölkədə qeyri-sabitlik yaratmaq və İranın maraqlarına xidmət edən təxribatlar törətmək idi. Casuslar İran rejiminin tapşırığı ilə Azərbaycan Respublikasının suverenliyi və müdafiə qabiliyyətinin zərərinə istifadə etmək üçün xarici dövlətlərin ölkəmizdə fəaliyyət göstərən şirkət və nümayəndəlikləri, Xəzər dənizində Hərbi Dəniz Qüvvələrinin keçirdiyi təlimlərin yeri və vaxtı, neft platformalarına daşınan yüklər barədə məlumatlar toplamışdır.

2022-ci ilin noyabr ayında DTX İran xüsusi xidmət orqanlarının nəzarəti altında yaradılmış qanunsuz silahlı birləşməni ifşa etmişdir. Əməliyyat zamanı 19 nəfər Azərbaycan vətəndaşı istintaqa cəlb olunmuş və onlardan qanunsuz silah-sursat, dini-ekstremist materiallar götürülmüşdür.

DTX tərəfindən Qusar rayonunda beynəlxalq terror təşkilatları ilə əlaqəli olan dini-ekstremist qruplaşma müəyyən edilərək zərərsizləşdirilmişdir. Araşdırmalarla cinayətkar birliyə daxil olan şəxslərin dairəsi, təşkilatlanma forması, təchizatı, planları ilə bağlı detallar və dəlillər müəyyən edilmişdir.

DTX 2024-cü ilin yanvar ayında Azərbaycan ərazisində İran kəşfiyyatı ilə əməkdaşlıq edən daha bir agentura şəbəkəsini aşkar etmişdir. Şəbəkənin üzvləri ölkədə müxtəlif sahələrdə fəaliyyət göstərərək İranın maraqlarına xidmət edən təxribat xarakterli məlumatlar toplayırdı. Əməliyyat zamanı bir neçə şəxs saxlanılmış və onların İran xüsusi xidmət orqanları ilə sıx əlaqədə olduğu müəyyən edilmişdir.

İranın Azərbaycana qarşı informasiya müharibəsinə də qarşı DTX effektiv fəaliyyətini davam etdirir. İranın Azərbaycana qarşı informasiya müharibəsi apardığı və bu çərçivədə sosial şəbəkələrdə, mediada yalan məlumatlar yaydığı məlumdur. DTX 2024-cü ildə İran xüsusi xidmət orqanlarının bu fəaliyyətini ifşa edərək, ölkədə İranın təsirinə düşən bir neçə şəxsi müəyyənləşdirmiş və onların dezinformasiya yaymasının qarşısını almışdır. Əməliyyat nəticəsində həmin şəxslər saxlanılmış, onların sosial mediada yaydığı yalan məlumatların ölkədə gərginlik yaratmağa yönəldiyi sübuta yetirilmişdir.

Beləliklə İranın Azərbaycana qarşı həyata keçirməyə çalışdığı onlarla təxribat hərəkətlərinin DTX tərəfindən qarşısının alınmasına dair sadəcə bir neçə nümunə təqdim etdik. Dövlət Təhlükəsizliyi Xidməti Azərbaycanın suverenliyinin və əhalinin təhlükəsizliyinin qorunması məqsədilə İranın Azərbaycana qarşı yönəlmiş təxribatlarına qarşı ciddi mübarizə aparır. Son illərdə həyata keçirilmiş uğurlu əməliyyatlar sayəsində İranın kəşfiyyat və terror fəaliyyətlərinə qarşı effektli tədbirlər görülmüş, ölkənin təhlükəsizliyi təmin edilmişdir. DTX-nın bu istiqamətdə gördüyü işlər Azərbaycan dövlətinin milli maraqlarını qorumaq üçün atılan mühüm addımlardır.