Putin və Kadırov arasında MÜNAQİŞƏ

SON XƏBƏRLƏR

Putin və Kadırov arasında MÜNAQİŞƏ

2025.03.28, 14:13

Son aylarda Çeçenistan lideri Ramzan Kadırovla Kreml və onun lideri Vladimir Putin arasında münasibətlər kəskin şəkildə pisləşib.

Gunaz.tv

GünazTV lent.az-a istinadla xəbər verir ki, Latviyanın “Mühüm hekayələr” nəşrinin yazdığına görə, münaqişə Kadırovun səhhətinin sürətlə pisləşməsi və onun Yaxın Şərqdəki müsəlman ölkələrindən gizli şəkildə dəstək almaq cəhdləri fonunda kəskinləşib.

Təhlükəsizlik orqanlarına və hüquq müdafiəçilərinə yaxın mənbələrin bildirdiyinə görə, ağır xəstə Kadırov qohumları üçün təhlükəsizlik zəmanəti istəyib və bu, Rusiya hakimiyyətinin sərt reaksiyasına səbəb olub.

Federal Təhlükəsizlik Xidmətinin Kadırovun müsəlman ölkələrinin liderləri ilə gizli danışıqları barədə məlumatları dərhal Putinə çatdırıb və bu, Kremldə hiddət doğurub. Nəşrin istinad etdiyi keçmiş kəşfiyyatçının sözlərinə görə, Kadırov öz hərəkətlərini Moskvadan gizlətməyə çalışıb, lakin əməliyyatçılar onun planlarını tez bir zamanda ifşa ediblər.

Ramzan Kadırovun uzun müddətdir ki, ağır xəstəliklə mübarizə apardığı məlum olub. “Novaya qazeta Avropa”nın yazdığına görə, böyrəkləri və mədəaltı vəzi ilə bağlı problemlər onun vəziyyətini xeyli çətinləşdirir və Çeçenistan rəhbəri getdikcə daha çox ictimaiyyətin diqqətindən yayınır, bu da onun xəstəliyi ilə bağlı şayiələri gücləndirir.

Kremllə münasibətlərin pisləşməsi fonunda Kadırov əvvəllər Çeçenistanın baş nazirinin müavini postunu tutan böyük qızı Ayşatı dövlət qulluğundan uzaqlaşdırıb. İndi o, regionun ən böyük ixracatçısı olan “Çeçen mineral suları” şirkətini idarə edir ki, bu da Kadırovun gözlənilməz hallar zamanı ailəsini qorumaq istəyini dolayısı ilə təsdiqləyir.

Münaqişə Kadırovun ən yaxın adamı, Dövlət Dumasının deputatı Adam Delimxanova da təsir edib. Mənbələrin bildirdiyinə görə, Dəlimxanov yuxarı instansiyaların razılığı olmadan zorakılıq hərəkətlərində fəallığının azaldılması və cinayət sxemlərində iştirakdan çəkinməsi zərurəti barədə aydın siqnal alıb. Hüquq müdafiəçilərinin fikrincə, Kreml son vaxtlar onun fəaliyyətindən, xüsusən də korporativ reydlər və qəsb şayiələri fonunda artan narazılıq nümayiş etdirir.

Şimali Qafqazda fəaliyyət göstərən hüquq müdafiəçiləri və müstəqil jurnalistlər Kadırovla Kreml arasında münaqişənin mövcud olduğunu təsdiq edərək vurğulayırlar ki, Çeçenistan rəhbərinin səhhətinin pisləşməsi və nüfuzunun zəifləməsi fonunda onun ətrafı aktivlərini və qohumlarını qorumağa çalışır.

Ş.E

GUNAZ.TV

SON XƏBƏRLƏR