Lübnan ordusu İsrail yaxınlığında Hizbullah infrastrukturunun 90%-ni məhv etdi

SON XƏBƏRLƏR

Lübnan ordusu İsrail yaxınlığında Hizbullah infrastrukturunun 90%-ni məhv etdi

2025.05.01, 11:58

Lübnan ordusu noyabr ayında əldə edilən atəşkəsdən sonra Hizbullahın İsraillə sərhəd yaxınlığındakı infrastrukturunun 90 faizindən çoxunu məhv edib.

Gunaz.tv

Məsələ həssas olduğu üçün adının açıqlanmasını istəməyən rəsmi, mediaya verdiyi açıqlamada bildirib ki, Litaninin cənubundakı ərazidə infrastrukturun 90 faizindən çoxu məhv edilib.

Lübnan prezidenti Cozef Aun isə "Sky News Arabia" telekanalına müsahibəsində Lübnan ordusunun hazırda ölkənin cənubunun 85 faizindən çoxuna nəzarət etdiyini bildirib.

Hizbullah və İsrail arasında bir ildən artıq davam edən hərbi əməliyyatlar noyabr ayında əldə olunan atəşkəs razılaşması ilə dayandırıldı. Bu razılaşma çərçivəsində Lübnanın cənubunda yalnız Lübnan ordusu və BMT sülhməramlılarının qüvvələri yerləşə bilər.

Razılaşmaya əsasən, Hizbullah öz döyüşçülərini Lübnanın Litani çayının şimalına, İsrail sərhədindən təxminən 30 kilometr (20 mil) kənara çəkməli və onun cənubunda qalan hərbi infrastrukturu dağıtmalı idi. Rəsmi bildirib ki, Hizbullahın cənubdakı möhkəm yeraltı infrastrukturunun çoxu ordu tərəfindən “bağlanıb”.

Əsgərlər həmçinin terrorçuların çayın şimalından cənuba keçməsinin qarşısını almaq üçün Litaninin cənubundakı əraziyə keçid məntəqələrinə nəzarəti gücləndiriblər.

Cozef Aun Birləşmiş Ərəb Əmirliklərində səfərdə olarkən Lübnan ordusunun heç bir problem və ya qarşıdurma olmadan öz rolunu yerinə yetirdiyini söylədi.

Onun sözlərinə görə, əsgərlərin sərhəd bölgəsindən tam yerləşdirilməsinə yeganə maneə İsrailin beş sərhəd mövqeyini işğal etməsidir.

Atəşkəs razılaşmasına əsasən, İsrail bütün qüvvələrini Lübnanın cənubundan çıxarmalı idi, lakin onun qoşunları strateji hesab etdiyi beş mövqedə qalmağa davam edir.

Bu arada təhlükəsizlik rəsmisi bildirib ki, Hizbullah ordu ilə əməkdaşlıq edir.

“Hizbullah geri çəkildi və nə istəyirsən et dedi. Artıq Litaninin cənubunda Hizbullah üçün hərbi (infrastruktur) yoxdur”, - deyə rəsmi bildirib.

Rəsmi əlavə edib ki, ordu tərəfindən tapılan sursatların çoxu ya İsrailin bombardmanları nəticəsində zədələnib, ya da o qədər pis vəziyyətdədir ki, onları ehtiyatda saxlamaq mümkün deyil və bu, ordunun onları məhv edilməsinə səbəb olub.

Şahin Elxanoğlu

GUNAZ.TV

SON XƏBƏRLƏR