Edamlar dərhal dayandırılsın - BMT İrana çaığrış etdi

SON XƏBƏRLƏR

Edamlar dərhal dayandırılsın - BMT İrana çaığrış etdi

2025.07.29, 10:49

Birləşmiş Millətlər Təşkilatı İranda edamların sayının kəskin artması ilə bağlı dərin narahatlığını ifadə edib və ölkədə ölüm hökmünün tətbiqinin dərhal dayandırılmasına çağırıb.

Gunaz.tv

Bu haqda BMT-nin İnsan Hüquqları üzrə Ali Komissarı Volker Türkün yaydığı bəyanatda bildirilib.

“Bu ilin əvvəlindən İranda yüzlərlə edam hökmünün həyata keçirilməsi ilə bağlı hesabatlar vəziyyətin nə qədər narahat edici olduğunu və ölkədə ölüm hökmünün tətbiqinin təcili dayandırılmasının vacibliyini göstərir”,- bəyanatda deyilir.

Qurumun hesabatına görə, 2025-ci ilin əvvəlindən İranda ən azı 612 nəfər edam edilib.

BMT-nin bəyanatına görə, 2025-ci ilin birinci yarısında edamların sayı keçən ilin eyni dövründə qeydə alınan rəqəmdən iki dəfə çoxdur; 2024-cü ilin birinci yarısında 297 edam qeydə alınıb.

İnsan Hüquqları üzrə Ali Komissar bildirib ki, mövcud məlumatlar İranda məhkəmələrin çox vaxt bağlı qapılar arxasında keçirildiyini və ədalətli məhkəmə standartlarına cavab vermədiyini göstərir.

Bununla eyni vaxtda bir sıra qeyri-hökumət təşkilatları da İran hakimiyyətinin İsraillə 12 günlük müharibədən sonra yüzlərlə insanı həbs etdiyini və onlarla insanı edam etdiyini bildiriblər.

İnsan haqları təşkilatları bildirirlər ki, İran hökuməti qorxu mühiti yaratmaqla İsraillə 12 günlük münaqişənin ifşa etdiyi zəiflikləri ört-basdır etməyə çalışır.

Qeyd edək ki, İran Çindən sonra dünyada ikinci ən yüksək edam nisbətinə malikdir və bu rəqəm Amnesty İnternational kimi insan haqları qrupları tərəfindən təsdiqlənib.

GünazTV

GUNAZ.TV

SON XƏBƏRLƏR