İranda yəhudilərə təzyiq - Millət vəkili dindirilib

SON XƏBƏRLƏR

İranda yəhudilərə təzyiq - Millət vəkili dindirilib

2025.12.11, 09:53

İran parlamentinin yəhudi millət vəkili Humayun Same Yeh Nəcəfabadi İran Təhlükəsizlik və Kəşfiyyat Nazirliyinə çağırılıb.

Gunaz.tv

Bu haqda millət vəkili yaydığı açıq məktubda bildirib.

O, bunu İranda yaşayan bir sıra yəhudilərin İsrailin farsdilli kanallarında edilən paylaşımlara şərh yazmaları və bəyənmələri ilə bağlı olduğunu söyləyib.

Millət vəkili son həftələr ərzində təhlükəsizlik məmurlarının onunla bir neçə dəfə məsləhət xarakterli görüşlər də keçirdiyini deyib:

"Görüşlər İran yəhudi vətəndaşlarının sosial media fəaliyyəti ilə bağlı təhlükəsizlik narahatlıqlarını həll etmək üçün keçirilib."

Humayun Same Yeh Nəcəfabadi həmçinin yəhudi icmasının üzvlərini potensial hüquqi və təhlükəsizlik təzyiqlərindən uzaq qalmaq üçün İsrailə məxsus və ya əlaqəli kanallara abunə olmaqdan, onları izləməkdən və ya onlarla əlaqə qurmaqdan çəkinməyə çağırıb.

O, xəbərdarlıq edib ki, bu kanallarda fəaliyyət göstərməyə davam etmək "məhkəmə problemlərinə" səbəb ola və işlərin araşdırılması və həlli prosesini "daha da çətinləşdirə" bilər.

Qeyd edək ki, İranda yaşayan 100 min nəfərə yaxın yəhudinin çoxu 1979-cu ildə mollalar hakimiyyətə gəldikdən sonra ölkəni tərk ediblər.

Bir neçə il əvvələ kimi İranda 25 min yəhudi yaşasa da, onların sayı getdikcə azalmaqdadır. Məlumatlara görə, hazırda ölkənin müxtəlif bölgələrində yaşayan yəhudilərin ümumi sayı 10 min civarındadır.

Bu azalma həm də təzyiqlərdən yaxa qurtarmaq üçün minlərlə yəhudinin kimliklərini dəyişdirmək, dini mənsubiyyətlərini gizlətmək məcburiyyətində qalması ilə əlaqələndirilir.

GünazTV

GUNAZ.TV

SON XƏBƏRLƏR