İranda vəziyyət çox pisdi - Erməni baş redaktor

SON XƏBƏRLƏR

İranda vəziyyət çox pisdi - Erməni baş redaktor

2026.01.09, 10:39

Paytaxtda müəyyən qədər zəifləməsinə baxmayaraq, İranda etiraz aksiyaları müxtəlif şəhərlərdə davam edir, ölənlər və yüzlərlə saxlanılan var, iqtisadi vəziyyət isə çox ağırdır.

Gunaz.tv

Bunu Tehranda nəşr olunan erməni “Araks” qəzetinin baş redaktoru Movses Keşişyan Ermənistanın Factor TV kanalına müsahibəsində deyib.

“İnsanların gündəlik yaşayışı ilə birbaşa bağlı olan məhsullar – məsələn, yumurta, ət və ərzaq – birdən-birə bəzi hallarda hətta 30–40 faizə qədər bahalaşdı.
Bu isə vəziyyəti daha da çətinləşdirdi. Hazırda gözləmə vəziyyəti var.Belə ki, insanlar hökumətin vəziyyəti tənzimləmək üçün daha ciddi addımlar atacağını gözləyirlər, əks halda hər şey daha da ağırlaşa bilər.
Dolların məzənnəsi kəskin şəkildə artıb։ Eyni zamanda internet kəsintiləri var, bütün bunlar xalqın psixoloji durumuna da təsir edir” – Keşişyan bildirib.

Onun sözlərinə görə, etiraz dalğasının daha geniş miqyas alması təhlükəsi mövcuddur։

“Əgər bir insanın aylıq gəliri, məsələn, 100–150 dollar təşkil edirsə, amma yemək üçün xərcləməli olduğu məbləğ 300 dollara çatırsa, bu zaman insanlar artıq dözə bilməyəcəklər. Təbii ki, partlayışlar baş verəcək və həmin partlayışların gücü daha da arta bilər.”

Erməni icmasının nümayişlərdə iştirak edib-etmədiyi ilə bağlı suala cavab olaraq Keşişyan bildirib ki, icma açıq bəyanat verməsə də, iştirak istisna edilmir:

“Onlar olmaya bilməzlər, çünki əgər sən bu ölkənin bir hissəsisənsə, bu ağrı sənin də ağrındır… Ölkədə baş verən inqilablar və böhranlar zamanı ermənilərin adı hər zaman olub, iştirak ediblər və bunu istisna etmək mümkün deyil”.

Movses Keşişyan ABŞ Prezidenti Donald Trampın etirazçılara qarşı hərəkətlərinə görə İran hakimiyyətinə xəbərdarlığına da toxunub:

“Bu, xarici təzyiqlərin məsələlərin başqa cür həllinə səbəb ola biləcəyi hallardandır։ Bunun faydalı olacağını düşünmürəm, ancaq eyni zamanda amerikalıların bu gün belə addımlar atacağını da qəti deyə bilmərəm.
Onlar planlaşdırırlarmı – nə edəcəklər? İranda rejim dəyişikliyi etmək istəyirlərmi? Əgər belə addımlar atmaq niyyətindədirlərsə, İran hakimiyyəti buna hazırdırmı və cavab tədbirləri görəcəkmi, bu qarşıdurma hansı istiqamətdə inkişaf edəcək, daha da gərginləşəcəkmi?
ABŞ tərəfi yalnız məhdud zərbələrə deyil, müharibəyə girməyə də hazırdırmı? Bunlar doğrudan da ciddi düşünməyə vadar edən suallardır.”

Qeyd edək ki, İranda etiraz aksiyaları dekabrın 28-dən davam edir։ Etirazlar zamanı baş verən toqquşmalar nəticəsində 38 nəfər həlak olub, minlərlə şəxs saxlanılıb.

GünazTV

GUNAZ.TV

SON XƏBƏRLƏR