İranda ümummilli internetin kəsilməsindən doqquz gündən artıq vaxt keçməsinə baxmayaraq, ölkənin müxtəlif bölgələrindən daxil olan məlumatlar internetə çıxışın hələ də son dərəcə məhdud və mərhələli şəkildə bərpa edildiyini göstərir. Müşahidəçilərin fikrincə, mövcud vəziyyət internetin real və genişmiqyaslı bərpasından xeyli uzaqdır.

İstifadəçilərin bildirdiyinə görə, şənbə günü səhər saatlarından etibarən bəzi ərazilərdə sabit internet xətlərində qısamüddətli və qeyri-sabit bağlantılar qeydə alınıb. Məhdud sayda istifadəçi bir neçə dəqiqə və ya saat ərzində internetə çıxış əldə edə bilib. Bununla yanaşı, mobil internet ölkənin böyük hissəsində hələ də əlçatan deyil və beynəlxalq internetə stabil girişlə bağlı təsdiqlənmiş məlumat mövcud deyil.

NetBlocks və Cloudflare kimi internet monitorinqi ilə məşğul olan qurumların məlumatlarına əsasən, İranda internet bağlantısının səviyyəsi hələ də normal göstəricilərin təxminən 2 faizi civarındadır. NetBlocks-un son hesabatında qeyd olunur ki, əlaqə göstəricilərində yalnız cüzi artım müşahidə edilib və ümumi vəziyyət “genişmiqyaslı kəsinti” statusunda qalır.

İstifadəçilərin sözlərinə görə, bəzi bölgələrdə internet bağlantısı yalnız sabit xətlər və ya məlumat mərkəzləri vasitəsilə mümkündür. Eyni zamanda, internetin sürəti son dərəcə zəif və qeyri-sabitdir. VPN istifadə edilmədən bir çox xarici sayta girişin mümkün olmaması, rabitə protokollarında nasazlıqlar, rouminq və mobil xidmətlərin işləməməsi kimi ciddi texniki problemlər davam edir.

Bu arada, bəzi istifadəçilər qısa mesaj (SMS) xidmətlərinin qismən yenidən aktivləşdirildiyini bildiriblər. Müşahidəçilər bu durumu rabitənin mərhələli və ciddi nəzarət altında bərpa olunmasının göstəricisi kimi qiymətləndirirlər. Lakin mövcud məlumatlar vəziyyətin daha çox daxili rabitə infrastrukturunun məhdud şəkildə işə salınmasına bənzədiyini, azad və açıq internetin bərpasını əks etdirmədiyini göstərir.

Analitiklərin fikrincə, internetə çıxışın qismən təmin edilməsi iqtisadi təzyiqlər, maliyyə və təsərrüfat fəaliyyətində yaranan ciddi problemlərlə bağlı ola bilər. Bununla belə, mütəxəssislər bildirirlər ki, beynəlxalq internetin tam və real şəkildə bərpası hələ baş verməyib və hazırda müşahidə olunan yalnız minimal və nəzarət altında saxlanılan bağlantıdır.

Bəzi istifadəçilər isə “internetin bərpa olunması” ilə bağlı yayılan məlumatlara ehtiyatla yanaşılmasını tövsiyə edərək bildiriblər ki, mövcud vəziyyət kəsintinin başa çatması kimi təqdim edilməməlidir. Onların sözlərinə görə, hazırkı bağlantılar əsasən məhdud, qeyri-sabit və yalnız xüsusi imkanlara malik istifadəçilərlə məhdudlaşır.

Qeyd edək ki, İranda ümummilli internet kəsintisi 8 yanvar 2026-cı il tarixində başlayıb və artıq 200 saatdan çoxdur davam edir. Monitorinq qurumlarının məlumatına görə, internetin genişmiqyaslı şəkildə bərpası son etirazlar və repressiyalarla bağlı yeni məlumatların üzə çıxmasına səbəb ola bilər. Bir çox müşahidəçi məhdudiyyətlərin davam etməsinin əsas səbəbini də məhz bu amillə əlaqələndirir.