Sepahın “Cəmaran” hərbi gəmisi Ərəb körfəzində batdı

SON XƏBƏRLƏR

Sepahın “Cəmaran” hərbi gəmisi Ərəb körfəzində batdı

2026.02.28, 22:42

Gunaz.tv

“Rəsəd Bəluçistan” mənbəsinin yaydığı məlumatlara əsasən, İran Hərbi Dəniz Qüvvələrinə məxsus “Cəmaran” adlı hərbi gəmi Ərəb körfəzində batıb. Hadisə son illərdə İranın dəniz hərbi strukturu üçün ən ağır zərbələrdən biri kimi qiymətləndirilir.

Yayılan bilgilərə görə, sözügedən döyüş gəmisi ABŞ qüvvələrinin hücumu nəticəsində ciddi zədələnib və daha sonra suyun altına qərq olub. Bildirilir ki, insident zamanı heyət üzvlərindən bir neçəsi həyatını itirib, bir qismi isə xilasetmə əməliyyatları nəticəsində sudan çıxarılaraq Bəndər-Abbasdakı tibb müəssisələrinə çatdırılıb. Lakin İran rəsmiləri hadisənin miqyası və itkilərin dəqiq sayı ilə bağlı hələlik rəsmi açıqlama verməyiblər.

“Cəmaran” 2009-ci ildə istismara verilmiş və İranın hərbi sənayesinin simvol layihələrindən biri kimi təqdim olunmuşdu. Gəmi zenit-raket sistemləri, dəniz hədəflərinə qarşı raket kompleksləri və sualtı qayıqlara qarşı avadanlıqlarla təchiz edilmiş çoxməqsədli döyüş platforması hesab edilirdi. Son illərdə müxtəlif hərbi təlim və nümayiş xarakterli əməliyyatlarda aktiv iştirak edirdi.

Hərbi müşahidəçilər bildirirlər ki, bu tip aktiv döyüş gəmisinin sıradan çıxması İranın Ərəb körfəzində nümayiş etdirdiyi dəniz üstünlüyü iddialarına ciddi zərbə vura bilər. Xüsusilə regionda artan gərginlik fonunda belə bir hadisə strateji balansın yenidən formalaşmasına səbəb ola bilər.

Hazırda ABŞ tərəfindən də hadisə ilə bağlı rəsmi təsdiq və ya təkzib açıqlaması yayılmayıb. Mövzu ilə bağlı əlavə məlumat əldə olunduqca ictimaiyyətə təqdim ediləcək.

GünAzTV
R.G

GUNAZ.TV

SON XƏBƏRLƏR