Müqəddəsləşdirmə hətta ölümdən sonra | Xameneinin Məşhəddə dəfni qətiləşdi

SON XƏBƏRLƏR

Müqəddəsləşdirmə hətta ölümdən sonra | Xameneinin Məşhəddə dəfni qətiləşdi

2026.03.04, 09:44

İran hakimiyyəti Əli Xameneinin dəfni üçün dini məkanın seçilməsi ilə onun ətrafında müqəddəs və siyasi fiqurdan daha üstün bir obraz formalaşdırmağa çalışır.

Gunaz.tv

SEPAH-a bağlı Fars Xəbər Agentliyi rəsmi şəkildə açıqlayıb ki, İranın keçmiş lideri Əli Xameneinin cənazəsi Məşhəd şəhərində, İmam Rza ziyarətgahında torpağa tapşırılacaq.

Yayılan məlumata görə, anım mərasimindən sonra cənazə dəfn ediləcək. Lakin mərasimin dəqiq tarixi və keçirilmə yeri hələlik açıqlanmayıb.

Bildirilir ki, dəfn yeri İmam Rza kompleksinin ərazisində, atasının – Cavad Xameneinin dəfn olunduğu məkanın yaxınlığında olacaq. Məşhədin seçilməsi onun doğulduğu şəhər və ailə bağları ilə əlaqələndirilir.

Açıqlanan plana əsasən mərasim üç mərhələdən ibarət olacaq:
Tehranda vida mərasimi, cənazənin Məşhədə köçürülməsi və yekun dəfn mərasimi. Bununla belə, tədbirlərin detalları barədə rəsmi məlumat verilməyib.

Bu qərar Xameneinin son hərbi hücumlar zamanı öldürülməsindən sonra verilib. Onun ölümü barədə ilkin məlumatı da məhz SEPAH-a bağlı media qurumları təsdiqləmişdi. Ölüm xəbərindən sonra dəfn yerinə dair müxtəlif ehtimallar irəli sürülmüşdü. Lakin Fars Agentliyinin açıqlaması bu müzakirələrə son qoyub.

Beynəlxalq media, o cümlədən Fransa Xəbər Agentliyi, Əl-Cəzirə və Yevronyus Fars-a istinadən dəfnin Məşhəddə keçiriləcəyini təsdiqləyib və bunu hakimiyyətin dini legitimlik görüntüsünü gücləndirməyə yönəlmiş simvolik addım kimi qiymətləndirib.

İmam Rza ziyarətgahının seçilməsi müşahidəçilər tərəfindən təkcə ailəvi qərar kimi deyil, ölüm sonrası mərhələdə ictimai rəyin idarə olunmasına və siyasi narrativin formalaşdırılmasına hesablanmış addım kimi dəyərləndirilir.

GünAzTV
R.G

GUNAZ.TV

SON XƏBƏRLƏR