İranın yüksək rütbəli hərbi komandirlərinin ard-arda öldürülməsi və Tehranın bölgədəki müttəfiq qüvvələr şəbəkəsinin dağılması fonunda, SEPAH-ın Qüds qüvvələrinin komandanı İsmayıl Qaaninin taleyi ən çox müzakirə olunan mövzulardan birinə çevrilib.

Ərəb mediası SEPAH-ın Qüds qüvvələrinin komandanı İsmayıl Qaaninin Mossad üçün casusluq ittihamı ilə edam edildiyini iddia edib. Birləşmiş Ərəb Əmirliklərinin “The National” nəşri təsdiqlənməmiş məlumatlara istinadən Qaaninin casusluqda ittiham edilərək edam olunduğunu yazıb.

Həmin nəşrin yazdığına görə, son günlər media və sosial şəbəkələrdə Qaaninin İsraillə əməkdaşlıq şübhəsi ilə saxlanılması və ya edam olunması barədə çoxsaylı iddialar və fərziyyələr yayılıb.

Qüds qüvvələrinin komandanı Qaani indiyədək bir neçə sui-qəsd cəhdindən sağ çıxmışdı və ABŞ ilə İsrailin bombardmanları zamanı belə Əli Xameneinin yanında olduğu, lakin sağ qaldığı bildirilir.

İsmayıl Qaani 2020-ci ildə Bağdadda ABŞ-ın hava zərbəsi nəticəsində Qasım Süleymaninin öldürülməsindən sonra Qüds qüvvələrinin komandanı təyin edilmişdi. O, İranın Yaxın Şərqdəki müttəfiq silahlı qruplarını koordinasiya edən şəbəkənin idarə olunmasına cavabdeh idi. Tehran bu şəbəkəni “müqavimət oxu” adlandırır.

Lakin son illərdə bu oxun əsas fiqurları bir-birinin ardınca öldürülüb. “Hizbullah”ın lideri Həsən Nəsrullah, “Həmas”ın liderlərindən İsmayıl Haniyə və SEPAH-ın onlarla yüksək rütbəli komandiri müxtəlif əməliyyatlar zamanı hədəfə alınıb. Son hadisədə isə İranın ali rəhbəri Əli Xamenei və ölkənin təhlükəsizlik strukturlarının bir sıra yüksək vəzifəli şəxsləri ABŞ və İsrailin birgə hücumu nəticəsində öldürülüb.

Bu ağır zərbələrə baxmayaraq, öldürülənlər arasında İsmayıl Qaaninin adı çəkilmir. Bu isə onun çoxsaylı əməliyyatlardan necə sağ çıxması ilə bağlı ciddi suallar doğurur.

Məlumatlara görə, son iki ildə Qaaninin öldürüldüyü barədə xəbərlər bir neçə dəfə yayılıb, lakin hər dəfə o yenidən ortaya çıxıb. İran və İsrail arasında 12 günlük müharibə zamanı da bəzi media qurumları onun öldüyünü iddia etmiş, lakin qısa müddət sonra Tehranda keçirilən bir tədbirdə göründüyü bildirilmişdi.

İsrailin İranın təhlükəsizlik strukturlarına genişmiqyaslı nüfuzu və yüksək rütbəli komandirlərə endirilən zərbələrdən sonra İran təhlükəsizlik qurumları mümkün casusların müəyyənləşdirilməsi istiqamətində geniş araşdırmalara başlayıb. Bəzi regional mənbələr bildirir ki, bu çərçivədə Qaani və onun yaxın çevrəsindən olan bir neçə nəfər müəyyən müddət ərzində sorğu-sual olunub və əlaqələri məhdudlaşdırılıb.

Bununla yanaşı, İsrailin əvvəllər İran rəsmiləri və Tehranla əlaqəli şəxslərdən ibarət hədəf siyahısı yayımladığı bildirilir. Mənbələr həmin siyahının artıq tamamlandığını qeyd edir, lakin orada İsmayıl Qaaninin adı yer almır.

Qüds qüvvələrinin komandanının taleyi ətrafında yaranmış qeyri-müəyyənlik, İranın əsas fiqurlarının bir-birinin ardınca aradan götürüldüyü bir dövrdə, ölkənin hakimiyyət strukturlarında dərin təhlükəsizlik böhranı barədə müzakirələri daha da gücləndirib.

GünAzTV
R.G

Ərəb Əmirliklərinin “The National” nəşri