Küveyt: İran xaos və terroru təsir aləti kimi istifadə edir

SON XƏBƏRLƏR

Küveyt: İran xaos və terroru təsir aləti kimi istifadə edir

2026.03.29, 20:45

Küveyt: İranın hücumları suverenliyin və beynəlxalq hüququn açıq pozuntusudur.

Gunaz.tv

Gunaz TV-nin məlumatına görə, Küveytin xarici işlər naziri Ərəb Liqasının 165-ci iclasında bildirib ki, İranın birbaşa öz ərazisindən həyata keçirdiyi hücumlar Küveytin suverenliyinin açıq pozuntusu olmaqla yanaşı, beynəlxalq hüququn, beynəlxalq humanitar hüququn və BMT Nizamnaməsinin kobud şəkildə pozulmasıdır.

Şeyx Cərah Cabir əl-Əhməd əs-Sabah vurğulayıb: «Bu vəhşi hücumlar regional və beynəlxalq təhlükəsizliyi ciddi şəkildə təhdid edir. İran reallıqları təhrif edərək və bəhanələr irəli sürərək öz hücumlarını əsaslandırmağa çalışır.»

O əlavə edib ki, bu hücumlar nəticəsində insanlar həlak olub və yaralanıb, mülki infrastruktura ciddi ziyan dəyib. Həmçinin onun sözlərinə görə, İraq ərazisində İranın dəstəklədiyi silahlı qrupların raket və pilotsuz aparat hücumları Küveyt və digər ərəb ölkələrini hədəfə alır.

Küveytin xarici işlər naziri çıxışında Ərəb Liqasının fəaliyyətini də tənqid edərək bildirib: «Ərəb Liqası sürətlə dəyişən regional çağırışlara cavab verməkdə məhdudiyyətlərlə üzləşir və qərarların qəbul edilməsi və icrası baxımından təcili və geniş islahatlara ehtiyac var.»

O, həmçinin vurğulayıb: «İran xaos və terroru təsir aləti kimi istifadə edir və bu, bölgəni sabitsizləşdirməyə yönəlmiş sistematik bir siyasətdir, müvəqqəti gərginlik deyil. Biz BMT Nizamnaməsinin 51-ci maddəsinə əsasən özünümüdafiə hüququna malikik və suverenliyimizi, ərazimizi və insanlarımızı qorumaq üçün bütün zəruri addımları atacağıq.»

Eyni zamanda, Küveyt Müdafiə Nazirliyinin sözçüsü bildirib ki, son 24 saat ərzində ölkənin hava hücumundan müdafiə sistemləri İran tərəfindən buraxılan 14 ballistik raketi və 12 pilotsuz uçuş aparatını ələ keçirərək məhv edib.

Məlumata görə, bir hərbi bazaya edilən birbaşa hücum nəticəsində 10 hərbçi yaralanıb və obyektlərə maddi ziyan dəyib.

Bununla yanaşı, Küveytin təhlükəsizlik qüvvələrinin “Hizbullah”a bağlı üç hüceyrəni aşkar edərək zərərsizləşdirdiyi bildirilir.

Küveyt rəsmiləri eyni zamanda İraq hökumətinin silahlı qruplara qarşı tədbir görəcəyinə dair verdiyi təminatları müsbət qiymətləndirib və İranla gələcək mümkün danışıqlarda region ölkələrinin, xüsusilə zərər görən tərəflərin iştirakını tələb ediblər.

Gunaz TV
R.G

GUNAZ.TV

SON XƏBƏRLƏR