Tramp: İranda itkin düşən amerikalı pilot uğurla xilas edilib

SON XƏBƏRLƏR

Tramp: İranda itkin düşən amerikalı pilot uğurla xilas edilib

2026.04.05, 09:55

Gunaz.tv

ABŞ prezidenti Donald Tramp bazar günü səhər saatlarında Truth Social platformasında paylaşdığı mesajda İranda vurulan qırıcı təyyarənin itkin düşmüş ekipaj üzvünün ABŞ qüvvələri tərəfindən xilas edildiyini açıqlayıb.

Gunaz TV-nin məlumatına görə, Tramp yazıb: «Biz onu tapdıq. Son bir neçə saat ərzində ABŞ ordusu ən cəsarətli axtarış və xilasetmə əməliyyatlarından birini həyata keçirdi. Bu zabit çox hörmətli biridir və indi onun sağ-salamat olduğunu məmnuniyyətlə bildirirəm.»

O əlavə edib ki, xilas edilən hərbçi «yaralanıb, lakin vəziyyəti yaxşılaşacaq.»

Bu riskli əməliyyat bir neçə gün əvvəl ABŞ-a məxsus F-15E qırıcısının İran üzərində vurulmasından sonra başlayıb. Təyyarənin digər ekipaj üzvü isə qısa müddət sonra sağ şəkildə xilas edilərək tibbi nəzarətə götürülmüşdü.

Tramp bildirib ki, xilasetmə əməliyyatı üçün «ölümcül silahlarla təchiz olunmuş onlarla təyyarə» bölgəyə göndərilib. O qeyd edib: «Bu, dünən həyata keçirilən başqa bir uğurlu xilasetmə əməliyyatından sonra baş verdi. Biz ikinci əməliyyatı riskə atmamaq üçün onu əvvəlcədən açıqlamamışdıq.»

ABŞ prezidenti vurğulayıb: «Bu, hərbi tarixdə ilk dəfədir ki, iki amerikalı pilot düşmən ərazisinin dərinliyində ayrı-ayrılıqda xilas edilir. Biz heç vaxt amerikalı döyüşçünü arxada qoymarıq.»

Tramp həmçinin bildirib ki, bu əməliyyatlar «İran üzərində hava üstünlüyünü və ABŞ-ın hərbi gücünü» nümayiş etdirir.

GünAzTV
R.G

GUNAZ.TV

SON XƏBƏRLƏR