İslamabadda danışıqlar: ABŞ və İran hələ üz-üzə gəlməyib

SON XƏBƏRLƏR

İslamabadda danışıqlar: ABŞ və İran hələ üz-üzə gəlməyib

2026.04.11, 17:05

Gunaz.tv

Gunaz TV-nin məlumatına görə, İslamabadda diplomatik proseslər fonunda Pakistan və İran nümayəndə heyətləri ABŞ–İran danışıqları öncəsi təmaslara başlayıb; bu proses hələ də dolayı şəkildə davam edir.

Beynəlxalq media, o cümlədən “Reuters”, “Al Jazeera” və “CNN” bildirir ki, indiyədək ABŞ və İran nümayəndələri arasında heç bir üz-üzə görüş baş tutmayıb və bütün təmaslar Pakistan vasitəçiləri üzərindən aparılır.

Bu çərçivədə tərəflər ayrı-ayrılıqda Pakistanın baş naziri “Şahbaz Şərif”, xarici işlər naziri “İshaq Dar” və ordu komandanı “Asim Munir” ilə görüşlər keçirib.

Məlumatlara görə, İran birbaşa danışıqlara başlamazdan əvvəl “Livan üzrə atəşkəs”, “sanksiyaların ləğvi”, “dondurulmuş vəsaitlərin azad edilməsi”, “müharibə təzminatı” və “Hörmüz boğazına nəzarət” kimi şərtlərini irəli sürüb və bu tələblər qəbul olunmadan birbaşa görüşlərin başlamayacağını açıqlayıb.

Bəzi mənbələr danışıqlarda “ilkin gecikmə” və ayrı-ayrı görüşlərin keçirildiyini qeyd edir və bildirir ki, şərtlər dəyişərsə, birbaşa danışıqlar yaxın saatlarda və ya günlərdə başlaya bilər.

Bu proses altı həftədir davam edən müharibənin qlobal enerji bazarına ağır təsir göstərdiyi və Hörmüz boğazının bağlı qaldığı bir vaxtda keçirilir; bu isə İranın bölgədə sabitliyi pozan siyasətini daha da ön plana çıxarır.

Son məlumata görə, danışıqlar davam edir və hələlik heç bir yekun razılaşma əldə olunmayıb. İslamabad şəhəri isə güclü təhlükəsizlik tədbirləri altında saxlanılır və birbaşa danışıqların başlanması ilə bağlı ortaq bəyanat verilməyib.

Günaz TV
R.G

GUNAZ.TV

SON XƏBƏRLƏR