İslamabad hazır vəziyyətdə: ikinci raund danışıqlar yaxınlaşır

SON XƏBƏRLƏR

İslamabad hazır vəziyyətdə: ikinci raund danışıqlar yaxınlaşır

2026.04.19, 13:37

Gunaz.tv

Gunaz TV-nin məlumatına görə; “Əl-Cəzirə” xəbər şəbəkəsi iki pakistanlı təhlükəsizlik mənbəsinə istinadən bildirib ki, ABŞ ilə İran arasında birbaşa danışıqların ikinci raundu böyük ehtimalla cümə günündən əvvəl İslamabadda keçiriləcək.

Adlarının açıqlanmasını istəməyən bu mənbələr vurğulayıb ki, “praktik əlamətlər” bu raund üçün hazırlığın getdiyini göstərir. Bu əlamətlər arasında İslamabad və Ravalpindi şəhərlərində təhlükəsizlik tədbirlərinin artırılması xüsusi qeyd olunur.

Məlumata görə, daha əvvəl danışıqların ilk raunduna ev sahibliyi etmiş “Serena” və “Marriott” hotelləri cümə gününə qədər yeni qonaqlar qəbul etmir və hazırkı qonaqların mərhələli şəkildə çıxarılması davam edir.

“Əl-Cəzirə” həmçinin bildirib ki, İslamabadın “Qırmızı zona” adlanan ərazisi ətrafında polis qüvvələrinin geniş şəkildə yerləşdirilməsi və nəzarət-keçid məntəqələrinin yaradılması Pakistanın danışıqlara yenidən ev sahibliyi etməyə hazırlaşdığını göstərir.

Eyni zamanda, İslamabaddan reportaj hazırlayan “Əl-Cəzirə” müxbiri təsdiqləyib ki, Pakistan “növbəti sülh danışıqları” üçün təhlükəsizlik tədbirlərini gücləndirir və bu görüşlərin keçirilməsi üçün şərait yaratmağa çalışır.

Bu danışıqların ilk raundu 11 aprel tarixində İslamabaddakı “Serena” hotelində keçirilmiş, lakin yekun razılaşma əldə olunmadan başa çatmışdı. Buna baxmayaraq, pakistanlı mənbələr bildirir ki, İslamabad hələ də irəliləyişə ümid edir və diplomatik səylərini “fasiləsiz” davam etdirir.

Məlumata əsasən, ikinci raund üçün konkret tarix hələ rəsmi şəkildə açıqlanmayıb və tərəflər arasında koordinasiya diplomatik kanallar vasitəsilə davam edir.

Günaz TV
R.G

GUNAZ.TV

SON XƏBƏRLƏR