İranda uranın böyük hissəsi “gizlədilib”

SON XƏBƏRLƏR

İranda uranın böyük hissəsi “gizlədilib”

2026.04.30, 18:31

Gunaz.tv

Gunaz TV xəbər verir ki; yeni yayılan hesabatlar göstərir ki, İranın zənginləşdirilmiş uranının əhəmiyyətli hissəsi hələ də İsfahan nüvə obyektlərində “gizli” şəkildə saxlanılır.

Yayılan məlumata görə, Ynet nəşrinin Beynəlxalq Atom Enerjisi Agentliyinin rəsmilərinə istinadən verdiyi xəbərdə Rafael Qrossi bildirib ki, yüksək səviyyədə zənginləşdirilmiş uranın böyük hissəsi ehtimal ki, İsfahan nüvə kompleksində qalıb və müfəttişlərin ona çıxışı hələ də məhduddur.

Hesabatda vurğulanır ki, bu materiallar ötən il baş vermiş hava hücumlarından sonra da həmin ərazidə qalıb və onların vəziyyətinin tam təsdiqi hələ də nəzarət qurumları üçün mümkün deyil.

Eyni zamanda, peyk görüntüləri göstərir ki, qarşıdurmalar başlamazdan əvvəl xüsusi konteynerlərdən ibarət yüklər bu obyektin tunellərinə daşınıb; bu isə uranın yeraltı infrastrukturlarda “gizlədilməsi” ehtimalını gücləndirir.

Qiymətləndirmələrə əsasən, İranın təxminən 440 kiloqram 60 faiz zənginləşdirilmiş uranı var ki, bu da silah səviyyəsinə çatmaq üçün cəmi bir texniki addım uzaqlıqdadır.

Digər məlumatlara görə, bu ehtiyatların bir hissəsi dağıntılar altında və ya qorunan tunellərdə “gizlədilib” və hətta hərbi hücumlar zamanı belə onlara çıxış son dərəcə çətin ola bilər.

İran isə nüvə proqramının dinc məqsədlər daşıdığını iddia etsə də, uranın “gizli” saxlanılması və müfəttişlərin çıxışının məhdudlaşdırılması bu proqramın real məqsədləri ilə bağlı ciddi narahatlıqları artırır.

Ekspertlər hesab edirlər ki, “gizli” uran ehtiyatlarının mövcudluğu beynəlxalq nəzarət mexanizmlərini zəiflədir və Tehranın strateji imkanlarını dünya ictimaiyyətindən kənarda saxlamaq cəhdinin göstəricisi ola bilər.

GünAzTV
R.G

GUNAZ.TV

SON XƏBƏRLƏR