Telegraph: SEPAH-la əlaqəli təbliğat şəbəkəsi Britaniyada açıq fəaliyyət göstərir

SON XƏBƏRLƏR

Telegraph: SEPAH-la əlaqəli təbliğat şəbəkəsi Britaniyada açıq fəaliyyət göstərir

2026.05.03, 12:58

Gunaz.tv

Gunaz TV-nin məlumatına görə: Britaniyanın “Telegraph” qəzeti SEPAH-la əlaqəli bir təbliğat şəbəkəsinin Böyük Britaniyada açıq şəkildə fəaliyyət göstərdiyini yazıb.

Məlumata əsasən, Britaniya hökumətinin nazirlərinə bildirilib ki, İran tərəfindən dəstəklənən bu təbliğat əməliyyatı ölkənin “milli təhlükəsizliyini” risk altına salır və dayandırılmalıdır.

Telegraph-ın yaydığı hesabatda qeyd olunur ki, “İslam Radio və Televiziya Birliyi” (IRTVU) adlanan şəbəkə müxtəlif media qurumlarını birləşdirir və onların yaydığı mesajlar İran hakimiyyətinin və onun bölgədəki proksi qüvvələrinin, o cümlədən HƏMAS, Hizbullah və husilərin mesajları ilə üst-üstə düşür.

Bu qurum ABŞ tərəfindən 2020-ci ildə sanksiyaya məruz qalıb. Vaşinqton həmin vaxt bəyan etmişdi ki, bu təşkilat SEPAH-ın “mülkiyyəti və ya nəzarəti altındadır” və onun “təbliğat qolu” kimi fəaliyyət göstərir.

Buna baxmayaraq, bu şəbəkəyə daxil olan bir neçə qurum – o cümlədən Mançesterdə yerləşən “Hidayət” kanalı, “Əhli-Beyt” şəbəkəsi və husilərin əsas media kanalı olan “Al-Masirah” Böyük Britaniyada rəsmi şəkildə qeydiyyatdan keçib.

Şəbəkənin digər üzvlərindən biri olan “Luluə” kanalı onlayn yayım və sosial media platformaları vasitəsilə HƏMAS və Hizbullahın yüksək rütbəli komandirlərini geniş şəkildə tərifləyir, onları “şəhid” və “qəhrəman” adlandırır, həmçinin Qasım Süleymanini mədh edir. “Luluə” kanalının Londonun şimalındakı Uembli bölgəsində ofisi yerləşir.

Britaniyanın kölgə təhlükəsizlik naziri Alisiya Kerns bu barədə deyib: “Yəhudilərə qarşı zorakılıq boşluqda yaranmır, nifrətlə dolu təbliğatın nəticəsidir”. O, Britaniyanın media tənzimləyici qurumu olan Ofcom-u “Shells For Media Production” şirkətinin – “Luluə” kanalının ana şirkətinin lisenziyasını ləğv etməyə çağırıb.

Kerns əlavə edib ki, “SEPAH tərəfdarı olan şəbəkələr və açıq şəkildə yəhudi əleyhinə mövqe sərgiləyən media qurumları uzun müddətdir ki, bizim azadlıqlarımızdan zəhərli təbliğat yaymaq üçün istifadə edir”. O vurğulayıb ki, Britaniyanın imkan və azadlıqlarından nifrət, ekstremizm və ya terror təbliğatını legitimləşdirmək üçün istifadə olunmamalıdır.

Telegraph-ın yazdığına görə, Britaniya Daxili İşlər Nazirliyinin sözçüsü bildirib: “İran tərəfindən qaynaqlanan təhdidləri çox ciddi qəbul edirik və əsas prioritetimiz Britaniya vətəndaşlarının həyatını və maraqlarını qorumaqdır”.

GünAzTV
R.G

GUNAZ.TV

SON XƏBƏRLƏR