İranda kirayə həyatı milyonlarla ailə üçün kabusa çevrilib

SON XƏBƏRLƏR

İranda kirayə həyatı milyonlarla ailə üçün kabusa çevrilib

2026.05.10, 12:56

Gunaz.tv

Gunaz TV-nin yaydığı məlumata görə, iqtisadi böhranın davam etdiyi və siyasi gərginliyin artdığı bir dövrdə İranda kirayə mənzil bazarı qiymətlərin kəskin artması səbəbindən yeni böhran mərhələsinə daxil olub.

Məlumatlara əsasən, Tehranın bir çox bölgəsində kirayə qiymətləri ötən illə müqayisədə 30-40 faiz artıb və bir çox kirayəçi artıq mənzil xərclərini qarşılaya bilmir.

Bazarda yayılan elanlara görə, ötən il 500-700 milyon tümən depozit və aylıq 15-20 milyon tümən kirayə ilə təklif olunan mənzillər indi daha yüksək qiymətlərlə bazara çıxarılır.

Ekspertlər bildirirlər ki, inflyasiya, valyuta məzənnəsinin yüksəlməsi, tikinti sektorundakı geriləmə və hökumətin uğursuz siyasətləri kirayə bazarındakı böhranın əsas səbəbləridir.

Bu arada İran hökuməti kirayə müqavilələrinin məcburi uzadılması və müəyyən dövrlərdə qiymət artımının qadağan olunması ilə bazarı nəzarətdə saxlamağa çalışır. Lakin daşınmaz əmlak bazarının iştirakçıları hesab edirlər ki, bu siyasətlər problemi həll etməyib, əksinə kirayəlik mənzillərin azalmasına və qeyri-rəsmi razılaşmaların artmasına səbəb olub.

İqtisadçı Qədir Məhdəvi bildirib ki, bir çox ailədə mənzil xərclərinin payı ümumi gəlirin 50-70 faizinə çatıb. Bu vəziyyət aztəminatlı ailələrə, gənc cütlüklərə və təkbaşına ailə idarə edən qadınlara daha ağır təsir göstərir.

Ekspertlər xəbərdarlıq edirlər ki, inflyasiya nəzarət altına alınmasa və tikinti sektoru canlandırılmasa, İranda kirayə və evsizlik böhranı daha da dərinləşəcək.

GünAzTV
R.G

GUNAZ.TV

SON XƏBƏRLƏR