Təcili: ABŞ və İsrail İrana yenidən hücuma hazırlaşır

SON XƏBƏRLƏR

Təcili: ABŞ və İsrail İrana yenidən hücuma hazırlaşır

2026.05.15, 23:15

Gunaz.tv

Gunaz TV-nin məlumatına görə, New York Times qəzeti iki Yaxın Şərq rəsmisinə istinadən yazıb ki, ABŞ və İsrail İrana qarşı hərbi hücumların yenidən başlanması ehtimalı üçün geniş hazırlıqlar aparır; bu hücumların hətta gələn həftənin əvvəlindən başlaması mümkündür.

Məlumata əsasən, bu hazırlıqlar atəşkəsin qüvvəyə minməsindən sonra ən geniş hərbi hərəkətlilik hesab olunur. Məlumatlı mənbələr bildiriblər ki, Donald Tramp hərbi əməliyyatların yenidən başlanmasına qərar verərsə, variantlar arasında İranın hərbi hədəflərinə və infrastrukturuna zərbələr endirilməsi var.

Digər ssenaridə isə xüsusi əməliyyat qüvvələrinin İran ərazisinə daxil olaraq yerin dərinliklərində yerləşən nüvə obyektlərini hədəfə alması da nəzərdən keçirilir. Amerikalı rəsmilərin sözlərinə görə, bu variantın icrası üçün mart ayından etibarən yüzlərlə xüsusi təyinatlı qüvvə Yaxın Şərqə göndərilib.

Donald Tramp Çin səfərinə yollanmadan əvvəl təhdidedici açıqlamasında deyib: “Ya razılaşacaqlar, ya da tamamilə məhv olacaqlar. Hər iki halda qalib bizik.”

New York Times yazıb ki, Tramp Çindən qayıtdıqdan sonra İranla bağlı taleyüklü qərarla üz-üzədir və onun baş müşavirləri danışıqlardakı dalanı daha çox hərbi hücumlarla qırmaq üçün planlar hazırlayırlar. Bununla belə, ABŞ prezidentinin hələ yekun qərar vermədiyi bildirilir.

Eyni zamanda, bölgə rəsmiləri İranı Hörmüz boğazını yenidən açmağa məcbur edəcək çıxış yolu axtarırlar. Bu məsələ Vaşinqtonun qərarlarında mühüm rol oynaya bilər.

Digər tərəfdən, İran rəsmiləri də hərbi cavaba hazır olduqlarını bildiriblər. İran parlamentinin sədri Məhəmməd Baqir Qalibaf yazıb: “Silahlı qüvvələrimiz hər hansı təcavüzə dərs verəcək cavab verməyə hazırdır.”

Bölgədə bu hərbi hərəkətlilik İran, ABŞ və İsrail arasında yeni birbaşa müharibə ehtimalı ilə bağlı narahatlıqları ciddi şəkildə artırıb.

GünAzTV
R.G

GUNAZ.TV

SON XƏBƏRLƏR