Gunaz TV-nin məlumatına görə, Britaniyanın The Telegraph qəzeti qalmaqallı hesabatında Donald Tramp administrasiyasına yaxın bəzi rəsmilərin Birləşmiş Ərəb Əmirliklərini İranla müharibəyə daha birbaşa qoşulmağa və Ərəb körfəzində İranın strateji adalarından birini ələ keçirməyə təşviq etdiyini yazıb; bu addım bölgədə gərginliyi daha da təhlükəli mərhələyə keçirə bilər.

Bu məlumata əsasən, Trampın təhlükəsizlik çevrəsinə yaxın bəzi şəxslər BƏƏ-nin Lavan adasına nəzarəti ələ almasını təklif ediblər. The Telegraph yazır ki, bu ada daha əvvəl aprel ayının əvvəlində BƏƏ-nin gizli hücumlarında hədəf alınıb, baxmayaraq ki, Əbu-Dabi bunu rəsmi şəkildə təsdiqləməyib.

Tramp administrasiyasının keçmiş yüksək vəzifəli təhlükəsizlik rəsmilərindən biri The Telegraph-a deyib: “Gedib onları götürün! Bu dəfə ABŞ çəkmələri yox, BƏƏ çəkmələri yerdə olacaq.”

Hesabatda bildirilir ki, müharibənin davam etdiyi bir vaxtda BƏƏ-nin regional proseslərdə rolu xeyli artıb və Əbu-Dabinin ABŞ və İsraillə münasibətləri sürətlə dərinləşir.

The Telegraph yazır ki, İran ABŞ və İsrailin fevralın sonlarında başladığı hücumlardan bəri BƏƏ-yə qarşı 2800-dən çox raket və pilotsuz uçuş aparatı buraxıb. Analitiklər bu hücumları Əbu-Dabi üçün “11 sentyabr anı” adlandırırlar; bu da BƏƏ rəhbərliyini təhlükəsizlik, ittifaqlar və regional mövqeyi barədə ciddi yenidən düşünməyə vadar edib.

Analitiklərin fikrincə, bu proses ABŞ–İsrail–BƏƏ oxunun daha sürətlə formalaşmasına gətirib çıxarıb; bu yeni geosiyasi düzülüş Yaxın Şərqdə güc balansını ciddi şəkildə dəyişə bilər.

Hesabatda həmçinin bildirilir ki, müharibənin əvvəlində BƏƏ Səudiyyə Ərəbistanı və Qətəri də İrana qarşı cavab hücumlarına qoşmağa çalışıb, lakin bu cəhdlər uğursuz olub.

Eyni zamanda, Əbu-Dabinin İsraillə münasibətləri də müharibə dövründə daha da güclənib. Məlumata görə, İsrail İran hücumlarına qarşı müdafiə məqsədilə Dəmir Qübbə hava hücumundan müdafiə sistemlərini BƏƏ-yə verib. Benyamin Netanyahu isə bu ölkəyə gizli səfər etdiyini və danışıqlarda “əhəmiyyətli irəliləyiş” əldə olunduğunu bildirib. Lakin Əbu-Dabi bu səfəri təkzib edib.

Bu məlumatların yayılmasından sonra İran BƏƏ-ni “bu təcavüzün aktiv tərəfdaşı” adlandırıb. BƏƏ rəsmiləri isə bu ittihamı rədd edərək İranın hücumlarını “terror aktları” kimi qiymətləndiriblər.

Analitiklər xəbərdarlıq edirlər ki, BƏƏ-nin bu qarşıdurmaya daha birbaşa daxil olması təkcə Ərəb körfəzində böhranı dərinləşdirməyəcək, həm də bölgəni misli görünməmiş təhlükəli bloklaşmaya sürükləyə bilər.

GünAzTV
R.G