Gunaz TV-nin məlumatına görə, Donald Trampın ABŞ-a məxsus Apache hərbi helikopterinin vurulmasına cavab veriləcəyini açıqlamasından cəmi bir neçə saat sonra Vaşinqton İranın cənubundakı hərbi hədəflərə genişmiqyaslı hücumlar həyata keçirib. Hücumların ardınca İran da bölgədəki Amerika maraqlarını hədəfə aldığını açıqlayıb.

CENTCOM-un məlumatına görə, ABŞ qüvvələri Hörmüz boğazı yaxınlığında yerləşən hava hücumundan müdafiə sistemlərini, radar mərkəzlərini və yerüstü idarəetmə məntəqələrini vurub. Amerika mənbələri hücumlar zamanı İran daxilində təxminən 20 hədəfin vurulduğunu bildiriblər.

Buna cavab olaraq İran Xarici İşlər Nazirliyi əməliyyatı “təcavüzkar addım” adlandırıb və ABŞ-ın bölgədəki bazaları və obyektlərinin hədəfə alındığını açıqlayıb. SEPAH isə İordaniyadakı Amerika bazasının və Körfəz ölkələrindəki bir sıra hədəflərin vurulduğunu iddia edib.

Eyni zamanda Bəhreyn, Küveyt və İordaniya hava təhdidlərinin qarşısının alındığını açıqlayıblar. İordaniya ordusu İran tərəfindən atıldığı bildirilən bir neçə raketin hədəfə çatmadan məhv edildiyini bəyan edib.

Atəşkəs əvvəlkindən daha kövrək görünür

Son hadisələr aprel ayında əldə olunan atəşkəsdən sonra Tehran və Vaşinqton arasında baş verən ən ciddi hərbi qarşıdurma hesab olunur. Mövcud vəziyyət göstərir ki, atəşkəs uzunmüddətli sabitlikdən çox, müvəqqəti fasilə xarakteri daşıyıb.

ABŞ Apache helikopterinin vurulmasını hərbi əməliyyatlar üçün əsas kimi göstərib. İran isə zəif görünməmək üçün cavab addımları atıb. Bu isə qarşılıqlı hücumların daha da genişlənməsi riskini artırır.

Hörmüz boğazı böhranın mərkəzindədir

ABŞ hücumlarının əsas hissəsinin Hörmüz boğazı ətrafında həyata keçirilməsi təsadüfi deyil. Dünyanın ən mühüm enerji marşrutlarından biri olan bu bölgədə təhlükəsizlik vəziyyətinin pisləşməsi qlobal enerji bazarlarına da təsir göstərə bilər.

Digər tərəfdən, İranın cavab hücumlarının bölgə ölkələrinə də təsir etməsi göstərir ki, Tehran və Vaşinqton arasında mümkün qarşıdurma artıq yalnız iki ölkə ilə məhdudlaşmaya bilər.

Qarşıdakı mərhələ

Qətər və Pakistan kimi vasitəçilərin diplomatik səylərinə baxmayaraq, son hadisələr tərəflər arasındakı gərginliyin yenidən yüksəldiyini göstərir. Danışıqların bərpa olunmaması halında hərbi qarşıdurmanın genişlənməsi və atəşkəsin tamamilə dağılması ehtimalı artır.

Hazırda Yaxın Şərq həssas mərhələyə daxil olub. Növbəti hərbi addımlar bölgədə daha geniş və təhlükəli qarşıdurmanın başlanmasına səbəb ola bilər.

GünAzTV
R.G