Xameneinin SEPAH-dakı nümayəndəsi: İsrailin məhv edilməsi hədəfindən vaz keçməyəcəyik

SON XƏBƏRLƏR

Xameneinin SEPAH-dakı nümayəndəsi: İsrailin məhv edilməsi hədəfindən vaz keçməyəcəyik

2026.06.21, 15:33

SEPAH rəsmisi ABŞ və İsrailə qarşı sərt mövqelərin davam etdiriləcəyini bildirib.

Gunaz.tv

Gunaz.tv xəbər verir ki, İran İslam İnqilabı Keşikçiləri Korpusunda (SEPAH) rəhbərin nümayəndəsi Abdullah Hacı Sadiqi ABŞ və İsrailə münasibətdə rejimin siyasətindən danışarkən “İsrailin məhv edilməsi” hədəfindən geri çəkilməyəcəklərini bildirib.

Hacı Sadiqi deyib: “Elə bir gün gəlməyəcək ki, biz Amerika ilə dost olaq və ya hədəflərimizdən, o cümlədən İsrailin məhv edilməsi amalından əl çəkək.”

O həmçinin bildirib ki, “təkəbbür qüvvələri ilə düşmənçilik sona çatacaq məsələ deyil” və əlavə edib: “Biz barışmaq üçün deyil, haqqımızı almaq üçün danışıqlar aparırıq.”

SEPAH rəsmisi ABŞ-a etimad göstərilməməli olduğunu iddia edərək, qarşı tərəfin öhdəliklərinin davamlı olmadığını irəli sürüb.

Bununla yanaşı, o, İran İslam Respublikasının fəaliyyət və nailiyyətlərini “böyük uğurlar” kimi qiymətləndirərək onların kölgədə qoyulmamalı olduğunu bildirib.

Müşahidəçilərin fikrincə, bu cür açıqlamalar daha çox ideoloji və təbliğat xarakteri daşıyır. İran hakimiyyəti uzun illərdir daxili böhranlar, iqtisadi çətinliklər, insan haqları pozuntuları və milli haqların tapdanması fonunda ictimai diqqəti yayındırmaq üçün oxşar şüarlardan istifadə edir.

Analitiklər qeyd edirlər ki, sərt və qarşıdurma yönümlü ritorika ölkənin xarici siyasətdəki problemlərini, iqtisadi böhranı və bölgədə zəifləyən mövqeyini gizlədə bilmir. Bu gün cəmiyyət şüarla real nəticə arasındakı fərqi əvvəlkindən daha aydın görür.

GünAzTV
R.G

GUNAZ.TV

SON XƏBƏRLƏR