Contact Us

SON XƏBƏRLƏR

Keçmiş diplomat: Şimali Koreya İranın tunel texnologiyasına görə 25 milyon dollar alıb

2026.06.25, 14:27
Keçmiş diplomat: Şimali Koreya İranın tunel texnologiyasına görə 25 milyon dollar alıb

Şimali Koreyanın keçmiş diplomatı bildirib ki, Pxenyan İrana tunel tikintisi texnologiyası təqdim etdiyinə görə təxminən 25 milyon dollar əldə edib. Onun sözlərinə görə, bu texnologiyadan Natanz və İsfahan yaxınlığındakı yeraltı nüvə obyektlərində geniş şəkildə istifadə olunub.

Gunaz.tv

Küveytdəki Şimali Koreya səfirliyinin keçmiş müvəqqəti işlər vəkili Ryu Hyon Vu bu fikirləri bu ay Cənubi Koreyanın nüfuzlu beyin mərkəzlərindən biri olan Koreya İnkişaf İnsitutu tərəfindən yayımlanan müsahibəsində səsləndirib.

“Şimali Koreya 2000-ci illərin əvvəllərində İrana tunel layihələndirməsi və texnologiyası təqdim edib və bunun müqabilində təxminən 25 milyon dollar alıb,” – deyə Ryu bildirib.

“Bildiyimə görə, Şimali Koreyanın tunel texnologiyası Natanz və İsfahan kimi bölgələrdə yerləşən yeraltı nüvə obyektlərində əhəmiyyətli dərəcədə tətbiq olunub,” – o əlavə edib.

Texnologiyanın Hizbullah və HƏMAS-a ötürülməsi ehtimalı

Ryu bildirib ki, Şimali Koreyanın Hizbullah və HƏMAS-la birbaşa əlaqələri barədə yayılan məlumatlar həqiqəti əks etdirmir.

“Bir çox media qurumu Şimali Koreya-Hizbullah və Şimali Koreya-HƏMAS əlaqələrindən danışır, amma bu doğru deyil,” – deyə o bildirib.

Onun sözlərinə görə, Şimali Koreyanın tunel texnologiyasını birbaşa bu qruplara ötürməsi ehtimalı zəifdir. Lakin o əlavə edib:

“İstisna etmək olmaz ki, İran Şimali Koreyadan aldığı tunel texnologiyasını Hizbullah və ya HƏMAS-a ötürüb.”

Daha öncə yayılan xəbərlər

Bu açıqlamalar mart ayında "The Washington Times" qəzetində dərc olunan xəbərlərdən sonra səsləndirilib. Həmin xəbərdə Şimali Koreya qurumlarının İrana yeraltı tikinti sahəsində təcrübə və raket texnologiyaları təqdim etdiyi bildirilirdi.

Qəzet ABŞ dəniz piyadalarının keçmiş zabiti və Brüs Beçtolun sözlərinə istinad edərək yazmışdı ki, Şimali Koreya mütəxəssisləri 2000-ci illərin əvvəllərində İsfahan da daxil olmaqla İranın yeraltı obyektlərinin tikintisində iştirak ediblər.

“İranın yeraltı obyektlərinin əksəriyyəti, o cümlədən İsfahandakı obyektlər, 2000-ci illərin əvvəllərində şimali koreyalılar tərəfindən inşa edilib,” – deyə Beçtol bildirib.

Onun sözlərinə görə, Şimali Koreyanın dəstəyi yalnız tunel tikintisi ilə məhdudlaşmayıb. Bu dəstəyə raket sistemləri, silah zavodlarının qurulmasında yardım, xüsusi komponentlərin təminatı və texniki personalın göndərilməsi də daxil olub.

İran və Şimali Koreya indiyədək bu iddia olunan texnologiya transferlərini ictimai şəkildə təsdiqləməyiblər.

 

C

Açar Sözlər :

SEÇİLMİŞ XƏBƏRLƏR

Çox oxunanlar