SEPAH İordaniya, Bəhreyn və Küveyt istiqamətində raketlər atdı

SON XƏBƏRLƏR

SEPAH İordaniya, Bəhreyn və Küveyt istiqamətində raketlər atdı

2026.07.13, 09:03

Gunaz.tv

Gunaz TV-nin məlumatına görə, bölgədə gərginliyin artdığı bir vaxtda Fars xəbər agentliyi və İran Ali Milli Təhlükəsizlik Şurasına yaxın olan NourNews ötən gecə İranın qərb və mərkəzində yerləşən bazalardan ABŞ-ın bölgədəki hərbi mövqelərinə raket və pilotsuz uçuş aparatları ilə hücumlar həyata keçirildiyini bildiriblər.

NourNews iddia edib ki, hücumların ilk dalğası ilə eyni vaxtda İordaniyada güclü partlayışlar baş verib. Fars isə İordaniyadakı Muvaffaq əl-Salti hava bazasının hədəf alındığını yazıb.

NourNews bir hərbi rəsmiyə istinadən bildirib ki, əməliyyatın hədəfləri ABŞ qüvvələrinin son 48 saat ərzindəki yerdəyişmələrindən sonra müəyyən edilib.

Eyni zamanda, sosial şəbəkələrdə yayılan görüntülərdə bəzi istifadəçilər raketlərin Xomeyn və Əligudərz ərazilərindən buraxıldığını bildiriblər.

SEPAH da yaydığı bəyanatda iddia edib ki, ABŞ-ın İordaniyadakı yanacaq anbarları və sursat anbarı, Bəhreyndə pilotsuz uçuş aparatlarının komanda və idarəetmə mərkəzi, Küveytdə isə yanacaq anbarları və Patriot hava hücumundan müdafiə sistemi hədəfə alınıb.

Bəhreyn Daxili İşlər Nazirliyi hava hücumu xəbərdarlığı siqnallarının işə salındığını açıqlayıb və vətəndaşlardan zəruri hallar istisna olmaqla əsas magistral yollarda hərəkət etməməyi istəyib. Nazirlik əlavə təhlükəsizlik göstərişlərinin də yayımlanacağını bildirib.

SEPAH-ın İctimaiyyətlə Əlaqələr İdarəsi də iddia edib ki, Hərbi Hava-Kosmik Qüvvələr Bəhreyndəki Şeyx İsa aviabazasında yerləşən vertolyotların təmir və texniki xidmət mərkəzlərini, P-8 elektron müharibə təyyarəsinin anqarını və pilotsuz uçuş aparatlarının komanda-idarəetmə mərkəzini hədəfə alıb.

Bu arada Küveyt Silahlı Qüvvələri bəyan edib ki, İranın ABŞ maraqlarına qarşı hücumları fonunda ölkənin hava məkanında "düşmən hava hədəfləri"ni izləyir və zərərsizləşdirir.

Küveyt Silahlı Qüvvələrinin Baş Qərargah rəisi bəyanatında bildirib: “Silahlı qüvvələr hazırda Küveytin hava məkanında düşmən hava hədəflərini izləyir.”

Gunaz TV
R.G

GUNAZ.TV

SON XƏBƏRLƏR