Rusiya Şimali Koredən 30 min yeni əsgər gətirir

SON XƏBƏRLƏR

Rusiya Şimali Koredən 30 min yeni əsgər gətirir

2026.07.26, 23:36

Gunaz.tv

Gunaz TV-nin məlumatına görə, Ukrayna Prezidenti Volodimir Zelenski bildirib ki, Rusiya Ukraynaya qarşı davam edən müharibəyə cəlb etmək üçün Şimali Koreyadan daha 30 min əsgər qəbul etməyə hazırlaşır.

Zelenski axşam videomüraciətində deyib: “Biz Rusiyanın Şimali Koreya ilə əməkdaşlığını da izləyirik. Rusiya daha 30 min Şimali Koreya hərbçisini cəlb etmək istəyir və iyun ayından etibarən onların Voronej vilayətində qəbuluna hazırlıq aparılır.”

İki ölkə arasında imzalanmış qarşılıqlı müdafiə sazişinə əsasən, Şimali Koreya 2024-cü ildə Ukrayna qüvvələrinin Kursk bölgəsində keçirdiyi genişmiqyaslı əməliyyatlardan sonra Rusiyaya təxminən 14 min hərbçi göndərmişdi.

Zelenski həmçinin bildirib ki, Şimali Koreya Rusiya üçün yeni ballistik raket buraxılış qurğuları hazırlayır. Onun sözlərinə görə, bu addımlar Moskvanın payız ayları üçün planlaşdırdığı hərbi hazırlığın bir hissəsidir.

Ukrayna Prezidenti vurğulayıb: “Bu, yalnız Ukrayna üçün təhlükə deyil. Rusiya Şimali Koreyaya döyüşməyi öyrədir, silahlarını təkmilləşdirməyə və onlardan real döyüş şəraitində istifadə təcrübəsi qazanmağa kömək edir.”

O əlavə edib: “Bütün bunlar Şimali Koreya raketlərinin çatdığı məsafədə yerləşən Asiya ölkələri üçün də təhlükədir.” Zelenski Ukraynanın bu təhdidə cavab verəcəyini də bildirib.

Məlumata görə, Şimali Koreya ötən il də Rusiyanın Ukraynaya qarşı müharibəsində iştirak etmək üçün 15 minə qədər əsgər göndərmişdi. Bu qüvvələr Kursk bölgəsində Rusiyanın nəzarəti bərpa etməsinə dəstək verib. Təsdiqlənməmiş məlumatlara əsasən, həmin döyüşlərdə azı 2 min Şimali Koreya hərbçisi həlak olub.

Moskva və Pxenyan arasında strateji tərəfdaşlıq sazişi qüvvədədir. Bir neçə gün əvvəl iki ölkənin xarici işlər nazirləri də münasibətlərin və hərbi əməkdaşlığın daha da möhkəmləndirildiyini bəyan ediblər.

GunAz TV
R.G

GUNAZ.TV

SON XƏBƏRLƏR